Бүгін жастар арасындағы жұмыссыздық деңгейін төмендету және кәсіпкерлікті дамыту, жастардың сұранысындағы қажеттіліктерді қамтамасыз ету мақсатында Тасбөгет кентінің орталық алаңында «Мүмкіндіктер керуені» ұйымдастырылды.
Шарада бос жұмыс орындары жәрменкесінен тұрақты жұмысқа 12 азамат, ал арнайы жұмыс орындары бойынша 5 жұмыс беруші мекемемен шарт жасалып, 6 мүмкіндігі шектеулі азамат арнайы жұмыс орындарына жолданды.
Жастар тәжірибесі бағдарламасы аясында 15 жас маман уақытша жұмыс орындарына жолдама алды. Қоңыс аудару бағдарламасы аясында өзге өңірлерге 1000 бос жұмыс орны, бұдан бөлек, 30 жұмыс беруші мекемелерден 200-ден аса бос жұмыс орындары ұсынылды.Сонымен қатар, мемлекеттік бағдарламалар («Дипломмен ауылға», «2021-2025 жылдарға арналған кәсіпкерлікті дамыту ұлттық жобасы», «Бизнес бастау»), мамандықтар туралы, жастарға және жас отбасыларға тұрғын-үй алу мүмкіндігі, «Отбасы Банк» АҚ-нің, «E-gov» электронды қызмет көрсету жүйесін пайдалану бойынша кеңес беріліп, тегін құқықтық және дәрігерлік қызметтер көрсетілді.
C. Майқанова атындағы мәдениет үйінде жастар тегін үйірмелерге, тілдік курстарға жазылып, арнайы «Жас журналистер», «Жас ақындар», «Жас модельдер», «Жас актерлер» кастингтері ұйымдастырылды. Сондай-ақ, ұлттық спорт түрлерінен (қазақ күресі, тоғызқұмалақ, қол күресі, гір көтеру, асық ату) сайыстар өткізіліп, жеңімпаздар сыйлықтармен марапатталды.
Кеш соңы заманауи әндермен жалғасын тауып, гала концертке ұласты. Алдағы уақытта тоқсанына бір рет ұйымдастырылатын «Мүмкіндіктер кеуенін» Қызылорда қаласының шет аймақтарында өткізу жоспарлануда.
Өзге де жаңалықтарды оқу үшін Telegram арнамызға жазылыңыз!