Фото: axios.com
KAZINFORM – Израиль бейсенбі күні түн ортасы шамасында Бейруттің оңтүстігіндегі «Хезболла» жетекшісі Хасан Насралланың мұрагеріне қарсы күшті әуе шабуылын жасады. Бұл Насралла қаза тапқаннан кейін бір аптадан кейін болды.
Соққы нысанасы Хашем Сафи ад-Дин болды, деп хабарлайды Axios және The New York Times.
Сонымен бірге The New York Times Израильдің үш шенеунігіне сілтеме жасай отырып, соққы кезінде Хашем Сафи ад-Дин жерасты бункерінде «Хезболланың» басқа да жоғары лауазымды жетекшілерімен кездесуге қатысқанын хабарлады.
«Хезболлаға» жақын дереккөздердің хабарлауынша, Бейруттің оңтүстігіндегі Хезболланың қорғаны ретінде белгілі Дахие аймағына барлығы 11 әуе бомбасы лақтырылған.
Ливанның ресми Ұлттық ақпарат агенттігі (NNA): «Осы уақытқа дейін қатарынан 10-нан астам соққы тіркелді, бұл Ливандағы Израиль соғысы басталғаннан бергі Бейруттың оңтүстік шетіндегі ең күшті шабуылдардың бірі болды» деп хабарлады.
Ливан армиясының мәліметінше, Бейруттан тыс таулы аймақтарға да соққы жасалған.
Сафи ад-Диннің соққыдан жарақат алғаны немесе алмағаны әзірге белгісіз, Израиль бұл туралы әзірге түсінік берген жоқ. «Хезболладан» да әзірге ешқандай хабар жоқ. Белгілі болғаны, бұл соққы бір апта бұрын «Хезболла» жетекшісі Хасан Насралланы өлтірген соққыдан да күштірек болды.
Атқарушы кеңестің басшысы ретінде Хашем Сафи «Хезболла» ұйымының саяси істерін қадағалайды.
Сафиеддин «Хезболланың» атқарушы кеңесін басқарумен қатар, топтың Консультативтік кеңесінің (Шура) негізгі мүшесі және оның Жиһад кеңесінің басшысы қызметін атқарады.
Бұл соққы Израиль қорғаныс күштері Ливанның оңтүстігіндегі құрлықтағы операцияларын кеңейткен кезде жасалды.
Өзге де жаңалықтарды оқу үшін Telegram арнамызға жазылыңыз!