Әлеуметтік-кәсіпкерлік корпорациялар азық-түлік бағасын тұрақтандыруға бөлінген 39 млрд теңгені тиімсіз игерген, деп хабарлайды ҚазАқпарат тілшісі.
Сыбайлас жемқорлыққа қарсы іс-қимыл агенттігінің төрағасы Олжас Бектенов ведомствоның алқа отырысында осындай дерек келтірді.
«Әлеуметтік-кәсіпкерлік корпорациялардың қызметінде елеулі сыбайлас жемқорлық тәуекелдері анықталды. Бұл – жер учаскелерін инвестициялық жоба желеуімен сату, аффилирленген тұлғаларға активтерді арзандатып сату үшін конкурстан тыс беру сияқты әрекеттер. Азық-түлік бағасын тұрақтандыруға бөлінген 39 млрд теңге нақты нәтижесіз игерілген. Корпорациялар тарапынан үлестес компанияларға несие беріліп, міндеттемелердің орындалуына бақылау жүргізілмеген. Аталған фактілер бойынша ӘКК лауазымды тұлғаларына қатысты 11 қылмыстық іс тіркелді. Шығын 7 млрд теңгеден асты», – деді Олжас Бектенов.
Айтуынша, агенттік әлеуметтік кәсіпкерлік корпорациялардың қызметін қайта қарауды көздейтін ұсынымдар енгізген.
Өзге де жаңалықтарды оқу үшін Telegram арнамызға жазылыңыз!