Осы жылдың алғашқы жартыжылдығында аймағымызда кәсіпкерлік пен өнеркәсіп салаларында оң өсім қалыптасты. Өңдеу өнеркәсібі мен сауда көлемі артты, инвестиция тарту көрсеткіші жоғарылады. Сонымен қатар шағын және орта бизнестің үлесі мен белсенділігі де елеулі түрде өскені байқалады. Бұл туралы бүгін Өңірлік коммуникациялар қызметінің ақпарат алаңында облыстық кәсіпкерлік және өнеркәсіп басқармасының басшысы Дәурен Әбілқайыров мәлімдеді.
– Биылғы жылдың алғашқы алты айында өңдеу өнеркәсібі мен сауда саласында айтарлықтай өсім бар. Шағын және орта кәсіпкерлік өнім көлемі артып, аймақ экономикасындағы үлесі 19%-ға жетті. Жалпы өңірде 65 мыңға жуық кәсіпкерлік субъектісі жұмыс істеп тұр. Онда еңбекке жарамды халықтың үштен біріне жуығы жұмыспен қамтылған. Бұл кәсіпкерлік саласының әлеуметтік маңызын да айқындайды. Сонымен қатар негізгі капиталға салынған инвестиция көлемі де артты. Өз кезегінде бұл көрсеткіш облысымыздың инвестициялық тартымдылығының артып келе жатқанын көрсетеді.
Қазір өңір экономикасын әртараптандыру бағытында жұмыс істеп жатырмыз. Ірі жобалар қатарында жаңа жылу электр орталығы, кірпіш зауыты, кондитерлік және макарон өнімдерін шығаратын кешен, түйе сүтінен құрғақ ұнтақ өндіретін зауыт, жолаушылар вагондарын жөндеу орталығы және қуаттылығы жоғары күн мен жел электр станциялары бар. Бұл жобалар іске қосылғанда жаңа жұмыс орындары ашылып, өндірістік әлеуетіміз арта түседі. Одан бөлек, «Қорқыт Ата» арнайы экономикалық аймағы аясында бірқатар инвестициялық жобалар жүзеге асуда. Осы және өзге де бастамалар аймақтың әлеуметтік-экономикалық дамуына серпін беретіні сөзсіз, – деді Дәурен Тұрғанбайұлы.
«АЖ» ақпарат
Өзге де жаңалықтарды оқу үшін Telegram арнамызға жазылыңыз!