SMARTNEWS.KZ басылымының хабарлауынша, NASA Crew-12 экипажын Халықаралық ғарыш станциясына жедел жөнелту үшін карантинге жапты. Станцияда қазір небәрі үш адам ғана қалып отыр.
NASA хабарлауынша, Crew-12 миссиясының ұшырылу күні 2026 жылғы 15 ақпаннан 11 ақпанға ауыстырылды. Бұған қаңтар айында медициналық көрсеткіштерге байланысты Crew-11 экипажының шұғыл эвакуациялануы себеп болған.
Эвакуациядан кейін Халықаралық ғарыш станциясында небәрі үш адам – бір америкалық және екі ресейлік астронавт қана қалған. Осы жағдай станция құрамын мүмкіндігінше тез толықтыруды талап еткен.
NASA дерегінше, әрбір ғарыштық ұшудың алдында міндетті түрде екі апталық карантин енгізіледі. Оның мақсаты – вирустық ауруы бар адамның ғарышқа ұшып кету қаупін барынша азайту.
Карантин тәртібі «Аполлон» бағдарламасы кезінен бері қолданылып келеді. Осы кезеңде экипаждың сыртқы ортамен байланысы қатаң шектеледі, ал астронавттармен байланысқа түсетін барлық адам медициналық тексеруден өтеді.
2026 жылғы 28 қаңтарда Crew-12 экипажының төрт мүшесі – NASA астронавтары Джессика Мейр (экипаж командирі) мен Джек Хэтэуэй (пилот), Еуропалық ғарыш агенттігінің астронавты Софи Адено және «Роскосмос» ғарышкері Андрей Федяев – АҚШ-тың Хьюстон қаласындағы NASA-ның Джонсон атындағы ғарыш орталығында екі апталық карантинге кірісті.
Crew-12 миссиясы SpaceX компаниясының Crew Dragon кемесімен, Falcon 9 зымыран тасығышының көмегімен Флорида штатындағы Канаверал мүйісіндегі SLC-40 старт алаңынан ұшырылмақ.
Бастапқыда ұшу 2026 жылғы 15 ақпанға немесе одан кейінгі мерзімге жоспарланған еді. Алайда Crew-11 миссиясының экипажы қаңтарда медициналық себептермен шұғыл эвакуацияланған соң, NASA мен SpaceX ұшыру кестесін қайта қарап, мерзімді алға жылжытты.
Қазіргі жоспарға сәйкес, алғашқы ұшыру терезесі 11 ақпанда АҚШ-тың шығыс уақыты бойынша таңғы 6:00-де (Мәскеу уақытымен 14:00) ашылады. Қосымша резервтік терезелер 12 ақпанда 13:38-де және 13 ақпанда 13:15-те қарастырылған.
Ал 6 ақпанда Crew-12 экипажы алдын ала ұшыру дайындығын карантин режимінде жалғастыру үшін NASA-ның Кеннеди атындағы ғарыш орталығына көшіріледі.
Өзге де жаңалықтарды оқу үшін Telegram арнамызға жазылыңыз!