Фото: Euronews
Ислам революциясы Сақшылар корпусының аэроғарыш күштері орбитаға жаңа зерттеу спутнигінің ұшырылғанын мәлімдеді, деп хабарлайды “Адырна” ұлттық порталы Euronews-ке сілтеп.
Ақпаратқа сәйкес, Батыс Иранның баллистикалық зымырандарды ұшыру үшін де пайдаланылуы мүмкін технологияны дамытып жатқанына алаңдайды.
Иран Ислам революциясы Сақшылар корпусының аэроғарыш күштері жасаған Gaem-100 зымыран тасығышын пайдаланып, Chamran-1 атты жаңа зерттеу жерсерігін орбитаға сәтті ұшырғанын хабарлады. Бұл бір жыл ішіндегі екінші сәтті ұшыру.
Тегеран өзінің ғарыштық бағдарламасын бейбіт мақсатты және БҰҰ Қауіпсіздік Кеңесінің қарарларына сәйкес деп мәлімдеп, ұзақ жылдар бойы дамытып келеді.
Дегенмен, батыс елдері спутниктік ұшыру жүйелері ядролық оқтұмсықты жеткізуге қабілетті баллистикалық зымырандарды жасаудан алынған технологияны пайдаланады деп қорқады.
Алайда, Тегеран бұл айыптауларды және ядролық қаруға ие болғысы келетінін жоққа шығарады.
Айта кетсек, Иранның зымыран бағдарламасына қатысты БҰҰ санкцияларының мерзімі өткен жылдың қазан айында аяқталды.
Ағымдағы ұшыру Таяу Шығыстағы соғыстың күшеюінен қауіптену, сондай-ақ ЕО мен АҚШ-тың “Иран Ресейге Украинаға қарсы соғыс жүргізу үшін ұшқышсыз ұшақтарды ғана емес, қысқа қашықтықтағы зымырандарды да жеткізеді” деген айыптауы халықаралық шиеленістің кезекті раундымен сәйкес келеді.
Өткен аптада Владимир Путин Санкт-Петербургте Иранның Ұлттық қауіпсіздік жоғары кеңесінің хатшысымен келіссөздер жүргізді.
Путин Иранның жаңа президентінің «Ресей мен Иран арасындағы стратегиялық серіктестікке қол жеткізуді нығайтуға бағытталған жаңа ірі мемлекетаралық келісімге» қол қоя алатын ресми сапарын күтіп отырғанын айтты.
«Біз Ресеймен ынтымақтастық жаңа президент командасы үшін басымдық болып қала беретінін бағалаймыз», – деді Кремль басшысы.
Ол осы жылдың мамыр айында ұшақ апатынан қайтыс болған президент Раисидің орнына келген Масуд Пезешкянды БРИКС саммитіне шақырған. Кездесу Қазан қаласында 22-24 қазанда өтеді.
Өзге де жаңалықтарды оқу үшін Telegram арнамызға жазылыңыз!