Қазақстанның басым аумағында 18 ақпан күні ауа райы құбылмалы болады, деп хабарлайды Azattyq Rýhy.
«Қазгидромет» синоптиктерінің мәліметінше, бүгін ел аумағына солтүстік-батыс циклоны және онымен байланысты атмосфералық фронттар әсер етеді. Соның салдарынан бірқатар өңірлерде жаңбыр мен қар түріндегі жауын-шашын түсіп, боран соғып, көктайғақ қалыптасуы мүмкін.
Әсіресе жол қозғалысына қатысушыларға сақ болу қажет. Күн райының күрт құбылуы көріну қашықтығын төмендетіп, жол жағдайын күрделендіруі ықтимал.
Ал оңтүстік-батыс және оңтүстік өңірлерде антициклон ықпалы сақталады. Бұл аймақтарда жауын-шашынсыз, салыстырмалы түрде тұрақты ауа райы күтіледі.
Сонымен қатар республика аумағында тұман түсуі мүмкін. Кей жерлерде жел күшейіп, екпіні артуы ықтимал.
Синоптиктер тұрғындарға ауа райы болжамын ескеріп, алыс жолға шыққанда сақтық шараларын қатаң ұстануға кеңес береді.
Өзге де жаңалықтарды оқу үшін Telegram арнамызға жазылыңыз!