Өскемен қаласында 3 жасар бала бесінші қабаттағы терезеден құлап мерт болды, деп хабарлайды ҚазАқпарат.
ШҚО Полиция департаменті баспасөз қызметінің мәліметіне сүйенсек, қайғылы оқиға 5 маусым күні қала іргесіндегі Күленов кентінде болған.
«3 жасар бала бесінші қабаттың терезесінен құлап кетіп, бірден сол жерде көз жұмды. Қазіргі уақытта оқиғаның барлық мән-жайы анықталып жатыр. Сотқа дейінгі тергеу амалдары жүргізілуде. Өзге ақпарат ҚР Қылмыстық іс жүргізу кодексінің 201-бабына сәйкес жария етілуге жатпайды», – делінген ақпаратта.
Осы ретте, облыстық Төтенше жағдайлар департаменті бала терезеден құлап кетпес үшін не істеу керектігін түсіндірді.
«Қайғылы оқиға ата-аналар үлкен балаларына кішілерін қарауды тапсырған кезде болады. Кейбіреулер тіпті бес жасар баласына бір жасар бүлдіршінге бас-көз болуды тапсырып жатады. Бұл мүлде дұрыс емес. Бала ересектер сияқты жауапкершілікті сезіне алмайды. Кейбір ата-аналар кішкентай балаларын көшеге, құстарға, көліктерге қарату, әкесіне немесе шешесіне қол бұлғау үшін терезе алдына өздері шығарады. Соның салдарынан бала биіктіктің қаншалықты қауіпті екенін түсінбейді», – дейді ШҚО ТЖД психологы Светлана Андрусенко.
Балалар москит торына сүйеніп, терезеден құлап кетуі мүмкін. Шыбыр-шіркейді үйге кіргізбейтін москит тор ешқашан балаларға қорған бола алмайды. Керісінше ондай тор қайғылы жағдайға себепкер болады. Өйткені бала өзін қауіпсіз сезінеді де оған сүйенеді.
Қайғылы оқиғаның алдын алғыңыз келсе:
– балаларды қараусыз қалдырмаңыз;
– пәтер терезелеріне арнайы қорғаныс құралдарын орнатыңыз;
– бала өздігінен аша алмайтындай етіп терезе тұтқасын құлыптаңыз;
– баланың терезе алдына шығуына жол бермес үшін жиһаздың барлық түрін терезелерден алысқа қойыңыз;
– баланы терезе алдына шығарып, көшеде не болып жатқанын көрсетуге үйретпеңіз. Ол сіз жоқта соны қайталауы мүмкін;
– балаларға ересектердің қарауынсыз балконға шығуға рұқсат бермеңіз.
Өзге де жаңалықтарды оқу үшін Telegram арнамызға жазылыңыз!