Қалалардың өсiп, ауылдың iрiленуi – өрке­ниеттi қоғамның жетiстiгi. Алайда, ауылдан бiр­жола тамыр үзiп қалмау  өзекті мәселе. Алып­тардың көбі осы ауылда дүниеге келгенін ескерсек, болашақта бұл үрдiстiң жiбi үзiлмес үшiн мұнда ұлттық мәдениеттiң ошағы, заманауи бiлiмнiң бастауы сақталуы тиіс. Бұл ретте Сыр өңірінде ілкімді іс, қолға алынған бірқатар жоба бар. Жақында үздік елді мекендер мен үлгілі шағын аудандарды іріктейтін конкурс өтпек. Бұл туралы облыс әкімі Нұрлыбек Нәлібаев Астана қаласындағы орталық коммуникациялар қызметінде өткен брифингте айтты.

«Конкурс елді мекендерде адам өмiрi мен денсаулығына  қолайлы орта қалыптастыру үшін өтуде. Жеңімпаздарды «Үлгілі ауыл», «Үлгілі аудан орталығы», «Қызылорда қаласының үлгілі шағын ауданы» номинациялары бойынша тәуелсіз сарапшы комиссия анықтайды», – деп хабарлады аймақ басшысы.

Конкурс шарттары бойынша «Үздік аудан орталығы»,«Үздік ауыл» және қаладағы «Үздік шағын аудан» анықталып, жеңімпаз­дарды қоғамдық ұйым өкілдері, экобелсенділер мен еріктілерден құралған тәуелсіз комиссия таңдайтын болады. «Үздік аудан орталығы» номинациясы бойынша І орынға арнайы жол таза­лағыш КАМАЗ және қалдық тасымалдаушы МАЗ автокөлігі, ассе­низатор мен кран-манипулятор берілмек. Ал ІІ орынға қалдық тасымалдаушы көлік, ассенизатор және жол тазалаушы трактор тағайындалған. ІІІ орынға ассенизатор мен жол тазалаушы трактор сыйға берілмек. «Үздік ауыл» номинациясын иеленген үш ауылға да бағалы сыйлықтар табысталады. І орын алған ауылға жер қазатын трактор мен самосвал ЗИЛ автокөлігі, ІІ орынға жер қазатын трактор мен тіркеме, ал ІІІ орынға жер қазатын трактор беріледі. «Үздік шағын аудан» номинациясы бойынша І орын алған шағын ауданға сквер, спорт алаңы салынады. ІІ орынға абаттандыру мен спорттық ойын алаңы сыйға берілсе, ІІІ орынға абаттандыру жобалары тарту етілмек. Конкурс нәтижесімен жеңімпаздарға 14 техника табысталмақ. Бұдан бөлек, озық шық­қан елді мекенге скверлер мен спорттық алаңдар са­лы­нып, көше-аулалары жарықтандырылады. Алдағы уа­қытта  конкурс дәстүрлі түрде жыл сайын өткізіледі деп жос­пар­ланған.

Бұдан бөлек, биыл «Ауыл аманаты» бағдарламасын Қызыл­орда облысында жүзеге асыруға 3 млрд теңге қарастырылғаны да мәлім. Ауыл тұрғындарының биз­несін бастауға немесе бұрыннан бар бизнесті  дамытуға мүмкіндігі бар. Жеңілдікпен несие мөл­шер­лемесі енгізіліп, бюджеттен қомақты қара­жат бөлінді. Тек талап етілетін басты нәрсе – бастама көтеру мен жұмыс істеуге деген ұм­тылыс. Ал «Ауыл аманаты» тектес бағ­дар­ла­малар тұрғындардың өмір сүру деңгейін жақ­сартудың бір қадамы болмақ.

А.СНАДИН

 

Өзге де жаңалықтарды оқу үшін Telegram арнамызға жазылыңыз!