Оқу-ағарту министрі Ғани Бейсембаев педагогтерді аттестаттау жүйесінің жеңілдетілгенін айтты, деп хабарлады turkystan.kz.
Бұл туралы министр «Хабар 24» арнасындағы «Бетпе-бет» бағдарламасына берген сұхбатта мәлімдеді.
«Педагог мәртебесін көтеруде біз ұстаздарға деген көзқарасты өзгертуіміз керек. Елімізде 350 мыңнан аса мұғалім бар. Олар балаларымыздың білім-біліктілігін арттыруда, жас жеткіншектерімізді тұлға етуде үлкен қызмет істеп жатыр. Сондықтан да мұғалімнің жұмысы шығармашылық жұмыс болуы керек. Ол ешнәрсеге алаңдамауға тиіс. Осы мәселені зерттей, зерделей келе, әріптестермен ақылдаса келе, бұған дейін портфолио жинайтын болса, оны алып тастауды шештік. Өйткені ол қағазбастылыққа, мұғалімнің негізгі жұмысынан алаңдатуға алып келетіні дәлелденді», – деді ол.
Министрдің айтуынша, қажетсіз тесттер алынып тасталуы керек.
«Қажетсіз тестілеудің көп екені айтылды. Оны да зерделедік. Сондықтан да педагогика-психологияға қатысты тесттерді алып тастап, тек мұғалімнің өз пәніне қатысты тестті қалдырдық. Негізгі ұстаным – мұғалімнің жетістігі оқушының жетістігімен бағалануы керек. Яғни, мұғалім неғұрлым оқушыны жетістікке жеткізіп, білімін ұштап жатса, соғұрлым ондай мұғалімдерді іздеп тауып, көтермелеуіміз, қолдауымыз керек», – деді Ғани Бейсембаев.
Өзге де жаңалықтарды оқу үшін Telegram арнамызға жазылыңыз!