Киелі Сыр жайлы сыр шерткенде руха­ни ұстаз, әулие Жәрімбет би Солтанұлына тоқталмай ке­ту мүмкін емес.

Жәрімбет әулие жастайынан зерек, алғыр бо­лып өскен. Ел арасындағы мал-мүлік, жер-суға байланысты тартыстарға ерте араласып, халықтың көңілінен шыға­тын шешімдерімен аты шығып, би атанған.

Бірде Жәрімбетке мал ұрлығына қатысы бар өте жақын туысқаны, «ертеңгі болатын төрелікте менің сөзімді сөйлерсің, дұшпанға таба қыла көрме, «қанына тартпағанның қары сынсын», деп туыстығын міндет қып, жүк артып кетіпті. «Тура биде туған жоқ» демекші, бабамыз бұл дауда туралығын айтып, туыс­қанын жазалатып, мал иесіне ат-тон айыбын төлеткен екен.

Қара қылды қақ жарған әділдігімен қоса Жә­рім­бет Сол­танұлы өзінің әулиелігімен де қазақ жұртына мәш­һүр болған.

Бірде Жәрімбет әулие Сырдария жағасында осы күн­гі Байқоңыр қаласының орнында ұйықтап жатып түс көреді. Оянғасын түсін жорып, «Осы орында көп жылдардан кейін бірінің үстіне бірі мінген үйлер тұр­ған үлкен шаһар болады, тілін мен түсінбейтін көп халық мекендейді, көзді қарықтырған, жарқыраған шам көріп тұр­мын», – деген екен.

Көне сорабы сақталған аңыз-әпсананың бірінде Жә­рімбет әулие, Марал ишан және ер Сейітпенбет үшеуінің сұхбат құрғаны баян­далады. Үш жүзге пір болған Марал ишан әңгіме барысында:

– Әй, Сейітпенбет, жұрт сені «ер Сейітпенбет, әулие Сейітпенбет» деп атайды. Әулие болсаң айтшы, біз өлгенде қайда жерленеміз? – деп сұрапты.

Сонда Сейітпенбет ойланып тұрып:

– Мен білсем, Марал, сен ел жайлаған суы мол ел­ді мекенде қаласың, Жәрімбет, саған өзің тұрған осы таудың басы бұйырар. Ал мен болсам қиян шөлге жайғасармын, – деп жауап беріпті.

Сейітпенбет бабаның осы айтқан көреген сөз­дері шын­дыққа айналады. Марал ишан Қар­мақшы ауда­нының шығысында, елге жақын қорымға жерленеді. Ал Жәрімбет әулиенің мәң­гілік мекені Қарақ тауының басы. Ер Сейіт­пенбет те өзі айтқан жерден орын алып­ты.

1995 жылы Қарақ тауындағы Жәрімбет әу­лие­нің ба­сы­на жаңадан сәні мен сәулеті жарас­қан күмбез ке­се­не салынды.

Ардақты пайғамбарымыздың жолын жалға­ған кеше­гі сахабалар да, олардың соңына ілес­кен әулие-әм­биелер де асыл дінімізді наси­хаттау, ел бірлігін, тыныштығын сақтау жолында аянбады. Солардың бірі болған Жәрімбет әу­лиенің ғибратты ғұмыры бізге өне­ге болып қала бермек.

Ислам МАРАТҰЛЫ,

Байқоңыр қалалық «Жәрімбет»

мешітінің бас имамы

 

Өзге де жаңалықтарды оқу үшін Telegram арнамызға жазылыңыз!