Алматы облысында небәрі үш жыл бұрын ғана бюджеттің 1 миллиард 600 миллион теңгесіне салынған мектеп қирап жатыр. Жыл сайын құрылысқа жабылып қалатын білім ордасының 700-ден астам оқушы әлі күнге дейін онлайн оқып жүр, деп хабарлайды Stan.kz ақпарат агенттігі КТК арнасына сілтеме жасап.
Мектепті дайын деп қабылдап алған Талғар ауданының шенеуніктері бір-біріне сілтеп отыр. Қазір құрылыстың сапасын жіті тексеріп барып қабылдауы керек болған Сәулет және құрылыс бақылау басқармасының басшысына қатысты қызметтік тексеріс жүріп жатыр.
Ғимараттың қабырғалары опырылып, едені қопарылған. Қазір қалпына келтіру жұмысы жүріп жатыр екен. Небәрі екі-ақ метр тереңдіктен су шығып жатыр. Тұрғындар ми батпақтың үстінен мектеп салу мүлдем миға қонымсыз деп отыр.
Талғар ауданына қарасты Дәулет ауылындағы мектеп құрылысы 2019 жылы аяқталып, оқушылар оқуына кіріскен. Алайда, сол уақыттан бері үш рет онлайнға ауысыпты. 2020 жылы – пандемияда, қалған екі жылда ғимараттың сапасы сын көтермей қирай бастады дейді ата- аналар. Олардың айтуынша, мектеп батпақтың үстінде орналасқандықтан жерасты суы көтеріліп, нысан шөгіп кеткен.
“Осы мектепке 1 миллиард 600 миллион бөлінді. Ол қайда кетті? Неге жауапкершілік жоқ. Лайық емес. Ақауы көп. Құрылыстар мына технология дегенді бұзған кезінде. Одан кейін тағы жөндеуге 135 миллион берді. Ол ақша қайда? Біз Талғарға бардық, облыс әкіміне бардық. Бәрі біздің жағамыздан қағып, «бәрі болады» дейді. Бірақ құр сөз”, – дейді Дәулет ауылының тұрғыны Әсем Атагелдиева.
“Онлайн сабаққа кеткеннен кейін мектебіміздің жыртықжамауы, есік-тесісігінен бәрі шыға бастады ғой. Сөйтіп онлайн сабаққа кіріп кеттік. Мектепке қайта келдік. Содан мектебіміздің көп жері құлап түскеннен кейін, қайта онлайға кеттік. Өз басым қол қойып, балам онлайнға кетсін деген жоқпын. Бірақ ата-аналар өзі рұқсат берді деп айтып жатыр. Негізі онлайн сабақты ешқандай ата-ана қалаған жоқ”, – дейді Дәулет ауылының тұрғыны Салтанат Отарбаева.
Талғар ауданың шенеуніктері ата-аналардың жанайқайына мүлдем басын қатырмайтын сыңайлы. Білім бөлімінің басшысы құрылыстан кемшілік кеткенін мойындаса да, мардымды жауап бермеді. Тек құрылыс бөліміне ғана сілтеумен болды.
“Жылы да басталып кетті ғой. Сол кезде мектептің ішінде арақабырғасы, негізгі қабырғасы деп айтпаймыз. Арақабырғасы шытынап жарылған. Бірінші қабаттың едені түсе бастаған. Оны қабылдап алған – аудандық құрылыс бөлімі”, – дейді Талғар ауданы білім бөлімінің басшысы Айнагүл Үшкемпірова.
Ал құрылыс бөлімінің бас маманы «басшылар жауап береді» деп, дәретханаға қаша жөнелді.
Аудан әкімінің орынбасары да жауап бермеді. Бірақ қазір осы мектептің құрылысын тексеру керек болған сәулет және құрылыс бақылау басқармасының басышысына қатысты қызметтік тексеріс жүргізіліп жатыр.
“Осы жұмысқа салғырт қарағаны үшін Алматы облысы әкімдігі тарапынан сәулет және құрылыс бақылау басқармасының басшысына қатысты қызметтік тексеріс жүргізіліп жатыр. Бірақ ол кісінің денсаулығының сыр беруіне байланысты, қазір бұл жұмыс уақытша тоқталды. Кейінге шегерілді. Ол кісі жұмысқа шыққан бетте қызметтік тексеріс жүгізілетін болады. Сонымен қатар бұл мәселеге қатысты Алматы облысы әкімі Марат Сұлтанғазиев облыс прокурорына бұл жұмысқа тікелей тексеру жүргізуін сұраған болатын”, – Алматы облысы әкімінің баспасөз хатшысы Ғалымұрат Жүкел.
Қазір құрылысқа арнайы сараптама тағайындалған. Қорытындысы шыққан соң, нақты қандай жұмыс атқарылу керектігі белгілі болады. Ал құрылыс жұмысын осы мектепті салған мердігер өз қалтасынан жүргізеді.
Өзге де жаңалықтарды оқу үшін Telegram арнамызға жазылыңыз!