Мемлекет басшысы Қасым-Жомарт Тоқаев барша қазақстандықтарды Конституция күнімен құттықтады, деп хабарлайды «Адырна» ұлттық порталы.
Президенттің айтуынша, осыдан 30 жыл бұрын референдумда қабылданған Ата Заң – тәуелсіздіктің, мемлекеттіліктің берік тұғырына айналды. Конституция ұлттың бүгіні мен болашағын айқындайтын құндылықтарды қамтып, барлық азаматтың құқығы мен мүддесін тең қорғайды.
“Баршаңызды Конституция күнімен құттықтаймын! Осыдан 30 жыл бұрын өткен референдумда халқымыз Ата заңын қабылдап, тарихи таңдауын жасады. Конституциямыз Қазақстан Республикасы тәуелсіздігінің, қазақ мемлекеттілігінің берік тұғырына айналды. Онда ұлтымыздың бүгінін және болашағын айқындайтын мызғымас құндылықтар мен қағидаттар нақты көрініс тапты. Ата заң Қазақстанның барлық азаматының мүддесін ұлтына, дініне қарамастан бірдей қорғайтын әлеуметтік мемлекет ретіндегі құқықтық іргетасын қалыптастырды. Конституция қоғамдық келісім мен ішкі тұрақтылықтың басты кепілі саналады. Сан түрлі саладағы жетістіктерге осы негізгі заңымызға сүйене отырып қол жеткіздік”, – делінген құттықтауда.
Президент Тоқаев үш жыл бұрын жүзеге асқан ауқымды конституциялық реформаны атап өтті. Оның басты нәтижесі – «Күшті Президент – ықпалды Парламент – есеп беретін Үкімет» тұжырымдамасы негізінде саяси жүйенің жаңғыруы. Сондай-ақ реформа аясында адам құқықтарын қорғауға, заң үстемдігін орнықтыруға басымдық беріліп, бірқатар жаңашыл ережелер енгізілгенін жеткізді.
«Әділетті, Таза, Қуатты әрі Қауіпсіз Қазақстан құру үшін әрбір азамат Конституцияны құрметтеп, оның барлық ережесін мүлтіксіз сақтауы қажет», – деді Президент.
Мемлекет басшысы сөз соңында қазақстандықтарға зор денсаулық, бақ-береке және жасампаз еңбек тіледі.
Өзге де жаңалықтарды оқу үшін Telegram арнамызға жазылыңыз!