Елордада көпқабатты үйдің терезесінен құлап кете жаздаған 3 жасар қызды құтқарып алған Сәбит Шонтақбаевтың ата-анасына облыс басшылығы тарапынан да құрмет көрсетілді, деп хабарлайды ҚазАқпарат тілшісі.
Жалағаш ауданына қарасты Аққұм ауылында тұратын Сәбиттің әкесі Серік Шонтақбаев пен анасы Гүлбаршын Пірімбетоваға аудан әкімі Асқарбек Есжанов ризашылық білдіріп, өңір басшысының Алғыс хатын табыстады.
«Оқыс оқиғаның алдын алып, 3 жасар бүлдіршінді аман сақтап қалуы – нағыз батырлық пен батылдықтың шынайы үлгісі. Сәбиттің бұл әрекеті Сыр жұртшылығының ғана емес, еліміздің барлық азаматтарының жүрегіне әсер етті. Осындай ержүрек, елжанды ұл өсіріп, тәлім-тәрбие бергендеріңізге Алғысымды жеткіземін», – деп жазылған Алғыс хат мәтінінде.
Сондай-ақ, облыс әкімінің атынан сый-сияпат көрсетіліп, теледидар тарту етілді.
Ал, ауыл шаруашылығымен айналысатын жергілікті кәсіпкер ержүрек азаматтың ата-анасына 1 млн теңге қаржылай сыйақы табыс етті.
Еске салсақ, бұдан бұрын Сәбит Шонтақбаевтың әйелі «Ерлік жасауға ешкім дайындалмайды» деп ой білдірген еді.
Өзге де жаңалықтарды оқу үшін Telegram арнамызға жазылыңыз!