Ақтау қаласының тұрғыны мектепте кейбір пәндердің сағатын қысқартуды сұрады, деп хабарлайды ҚазАқпарат.
Облыс әкімдігінің Telegram каналына Ақтаудағы 1-сынып оқушысының ата-анасы оқыту бағдарламасында дене шынықтыру пәні аптасына үш рет өткізілетінін, бұл мектепке жаңа барған баланың ойын бөлетінін айтып шағымданған.
Желі қолданушысы 1-сынып оқушыларына дене шынықтыру сабағын азайтып, орнына әліппе оқытуды сұрап, ұсыныс жасады.
«Дене шынықтыру сабағын аптасына бір мәрте өтсе де жеткілікті» дейді тұрғын.
Ата-ананың сауалына Ақтау қалалық білім бөлімінің мамандары жауап берді.
– 2007 жылғы 27 шілдедегі Білім туралы заңның 5-бабы 6-тармақшасы бойынша Қазақстандағы бастауыш, негізгі орта, жалпы орта білім берудің үлгілік оқу жоспары бекітілді. Осы үлгілік оқу жоспарын негізге ала отырып, ҚР Оқу-ағарту министрінің 12 тамыздағы бұйрығына сәйкес бастауыш, негізгі орта, жалпы орта мектептерде дене шынықтыру пәні аптасына 3 сағаттан өткізілетінін еске саламыз, – деді жауапты бөлім мамандары.
Осылайша білім бөлімі сабақты қысқартуға болмайтынын түсіндірді.
«Telegram каналға қазіргі таңда 11 399 адам тіркелген. Осы уақытқа дейін 12 216 сұрақ келіп түсіп, оның 12 190-на жауап берілді», – дейді қоғамдық коммуникация орталығы БАҚ-пен жұмыс бөлімінің маманы Ақмарал Құлтумаева.
Өзге де жаңалықтарды оқу үшін Telegram арнамызға жазылыңыз!