Санаулы күндерден соң мың сан түлек аяулы мектебімен қоштасады.

Мектеп бітіру мерекесі әр адамның өміріндегі ерекше, ұмытылмас күндердің бірі. Себебі, тарыдай болып кіріп, таудай болып шыққан бүгінгі түлектер білім нәрімен сусындаған мектеппен қоштасып, үлкен өмірге жолдама алады. Оған қоса Ұлттық бірыңғай тестілеуге қатысады. Осы сәттерде оқушының жүрегі тебіреніп, қобалжып уайымдауы мүмкін. Өз шәкірттеріммен қатар, барлық бітіруші түлекті, осы мақалам арқылы жігерлендіргім келеді.
Жас түлек, ең бастысы сен ата-анаңның сүйікті перзентісің. Саған әркез сенім білдіріп, қолдау білдіретін жақындарың бар. Олар асқақ армандарың орындалып, өміріңде бақытты сәттер көп бол­сын­шы деп тілеуіңді тілеп жүр. «Баламның табанына кірген шөңге менің маңдайыма кірсін» деп ата-анаң сен үшін бәріне дайын. Тіпті ҰБТ-дан аз балл алып қалсаң да, олар қасыңнан табылады. Бұл сынақтан өтпесең, келесі кезеңде міндетті түрде өтесің.
Мектеп өмірін де жақсы өткіз­дің. Біті­руші сәт­ке жеттің. Ұстаз­дарыңның да үкілеген үмітісің. Олар тек бір ғана тестілеу­ден сәтті өткеніңді емес, өмірде жолың болып, жақсы азамат болғаныңды тілейді. Алдыңда сан түрлі сынақтар, жауапты сәттер кездеседі. Сол уақыт үнемі жадыңда болсын, өмірдің барлық сәтсіздіктері бақытсыздық емес.
Иә, сен ең бақытты жансың! Достарыңнан қалмай мектеп бітіріп, алға қадам жасап барасың. Бастысы алдыңа үлкен мақсаттар қой. Арманда. «Армансыз адам – қанатсыз құспен тең» дейді. Асыл арман­ың үлкен жетістік­терге жеткізеді. Ең бастысы, Абай атамыз айтқандай, «өзіңе сен, өзіңді алып шығар, еңбегің мен ақылың екі жақтап». Әркез өзіңе деген сеніміңді жоғалтпа!
Мемле­кетіміз оқимын, жақсы істерді үйренемін деген оқушылар үшін барлық жағдай жасаған. Тек білім ғана адамға өмір жолын дұрыс таңдауда еркіндік пен өз-өзіңе деген сенімділік, табысқа жетуге және өз қабілетін жүзеге асыруға мүмкіндік береді. «Жастары жалын жүректі, өршіл намысты, биік рухты болса, ол елдің еңсесі биік болады» деген сөз бар. Қандай кедергілер­ге кездессең де, жігеріңді жасытпа! Алда сені күтіп тұрған армандарың көп екенін ойла! Еліміздің болашағы – сендердің қолдарыңда. Талаптарың оң,сапарларың сәтті болсын!
Динара КЕНЖЕБАЕВА,
№106 орта мектеп директорының
оқу ісі жөніндегі орынбасары

 

Өзге де жаңалықтарды оқу үшін Telegram арнамызға жазылыңыз!