Күнге аллергия (фотодерматоз) — бұл терінің ультракүлгін сәулелермен жанасуына жауап ретінде пайда болатын ағзаның жоғары сезімталдығының көрінісі. Неліктен күнге аллергия пайда болады? Оның белгілері қандай? Күнге аллергиясы бар адамдар жағдайын жеңілдету үшін не істеу керек? Бұл сұрақтарға «Известия»-ға аллерголог-иммунолог Светлана Шаршкова жауап берді, – деп хабарлайды Massaget.kz тілшісі.
Ол күннің сәулесі аллергенге жатпайтынын айтты. Аллергияны күннің сәулесі емес, тері астындағы фотосенсибилизаторлардың шамадан тыс жиналуы тудырады. Фотосенсибилизаторлар – күн сәулесінің әсерінен пайда болатын және терінің күн сәулесіне сезімталдығын арттыратын заттар.
«Күнге аллергияның көріністері бірнеше минуттан бірнеше сағатқа дейін, тіпті бірнеше күнге дейін және әдетте терінің ашық жерлерінде пайда болады. Теріде біркелкі қызару, ісіну немесе дақтар, көпіршіктер, қабыршақтанулар түріндегі әртүрлі бөртпелер пайда болады. Адамның үсті қышиды, күйдіріп ауырады және жағымсыздық сезінеді», – деді Шаршкова.
Оның айтуынша, көбіне күнге аллергия – уақытша құбылыс. Бірақ ауыр жағдайларда, жоғарыда аталған белгілерден басқа, жалпы хал-жағдайдың нашарлауының белгілері пайда болуы мүмкін: бас ауруы, жоғары температура.
«Әмбебап ем жоқ. Алғашқы белгілер пайда болған кезде көлеңкеге немесе ғимарат ішіне кіру керек. Айқын белгілер кезінде клиникада дәрі-дәрмекпен емделу қажет: антигистаминдік дәрілер ішу, теріге арналған кремдер немесе мазьдер жағу», – деп атап өтті дәрігер.
Ол сондай-ақ күнге аллергиясы бар адамдарға қажетті кеңестермен бөлісті.
«Маусымның басында күннің астында көп жүрмеңіз. Күн сәулесінің астында болатын уақытты біртіндеп арттырған жөн. Осылайша, ағза ультракүлгін сәуленің әсеріне біртіндеп үйренеді және реакция қаупі біршама төмендейді. Сәулелену күшті болған кезде сағат 11:00-ден 17:00-ге дейін далаға шықпаңыз. UVA- және UVB-сәулеленуден қорғауы бар құрал қолданыңыз. Жабық және ашық түсті киім киіңіз», – деп кеңес берді Шаршкова.
Фото: Massaget.kz
Өзге де жаңалықтарды оқу үшін Telegram арнамызға жазылыңыз!