АҚШ-та коронавирус індетіне қарсы ішетін дәрі қолданысқа енгізілуі мүмкін. Ел үкіметі осылайша, COVID-19-дың жаңа толқынының пайда болу қатерін азайтуды жөн көрген деп жазады The New York Times.
Ақ үй COVID-19-ға қарсы Pfizer компаниясы өндіретін Paxlovid дәрісінің қолданысқа енгізілетінін мәлімдеді. Федералдық үкімет Род-Айленд штатында орналасқан Провиденс емханасында коронавирусқа шалдыққан науқастарды тексеру мен оған Paxlovid-ті беруге кететін шығындардың орнын толтырады.
Біз індеттен қайтыс болу деңгейі айтарлықтай деңгейде азаятындай деңгейге жетуге тырысамыз және ол күн де алыс емес деген ойдамыз. Вирустан дүние салу дерегі расымен де азайып келеді, – деді СOVID-19 мәселелері бойынша Ақ үйдің үйлестірушісі, доктор Ашиш К. Джа.
Paxlovid дәрісін жеңіл және орташа ауырлықтағы коронавирусқа шалдыққан 12 жастан асқан науқастарға қабылдауға рұқсат етілген.
Мәліметтерге сүйенсек, АҚШ-та күн сайын қауіпті індетті жұқтырудың 110 мыңнан астам жаңа жағдайы тіркеледі. Вирустың таралуы жарты айдағы көрсеткішке қарағанда 30%-ға төмендеген.
Өзге де жаңалықтарды оқу үшін Telegram арнамызға жазылыңыз!