3 сәуірде оралдық Фатима Асқар есімді балаға құны миллиард теңгеге жуық тұратын «Золгенсма» препараты егілді. Қуанышты жаңалықты қыздың ата-анасы Instagram парақшасында бөліскен.
«Бүгін – тарихта қалатын күн. Фатимамызға екпе салынды. Біз бақыттымыз. Қызымызды Қазақстан халқы аман алып қалды. Осы уақыт ішінде біз үшін алаңдап, қолдау көрсеткен баршаға шын жүректен алғыс айтамыз», – деді Фатиманың әкесі Қанат Құспанов.
Фатиманың ата-анасы қызының емделуіне алты ай ақша жинаған. Дәрігерлер балаға омыртқа бұлшықетінің атрофиясы деген диагноз қойған.
Фатима – Батыс Қазақстан облысында әлемдегі ең қымбат екпені салдырған екінші бала. Біріншісі ақсайлық Эмир Шахмаров болған. Сонда бір миллиард теңгені қазақстандықтар жинап берген еді. Қазір баланың жағдайы жақсы, оңалту курсынан өтіп жатыр.
Өзге де жаңалықтарды оқу үшін Telegram арнамызға жазылыңыз!