Профилактикалық медицина академиясының президенті, Америка денсаулық сақтау қауымдастығының мүшесі, иммунолог Алмаз Шарман «Еліміздегі қай вакцина коронавирустың үнді штаммына тиімдірек қорғайды?» деген сұраққа жауап берді, деп хабарлайды Stan.kz ақпарат агенттігі.
«Вакциналарға екі тұрғыда қарау керек деп есептеймін. Қазақстандағы «Спутник V» вакцинасы екі компонентін толық алған жағдайда ағзаны вирустан жақсы қорғай алады. Сыңар компонентін емес, қос компонентін бірдей алу маңызды. Гамалея институты мәлімдеген зерттеулер зертхана құтысында жасалған. Яғни, олар вирусты құты ішінде заласыздандырды. Негізі, вакцинаның тиімділігі дәлелдейтін жалғыз дұрыс жол – шынайы жағдайда сынау. Басқа мемлекеттерде аденовирустық вакциналар дельта-вирустан екі компонентін бірдей алғанда тиімді қорғай алатынын көрсетіп отыр. Мен елімізде салынып жатқан вакциналар «дельта+» штамынан да қорғай алады деп топшылап отырмын. «Спутник V» вакцинасы да аденовирустық екпе болғандықтан, оны да дельта штамынан қорғайды деп айтуға болады», – деді маман.
Сөзінше, қазақстандық вакцина мен қытайлық екпенің жасалу жолдары ұқсас.
«Қазақстандағы вакциналардың келесі түрі инактивтендірілген екпе екенін білесіздер. Ол – Sinopharm, Sinovac сияқты вакциналар. Мен QazVac-ты да осы қатарға қосар едім. Бұл екпелер көбінесе қайғылы жағдайлардан қорғауға бағытталған. Яғни, ауыр жағдайдағы науқастарды жақсы қорғайды. Бұл екпелер науқас жұқтырудан азырақ қорғағанымен, реанимация мен жасанды өкпе аппараттарына түспеуіне көмектеседі. Аталған вакциналардың осы қасиеттері дельта штамына да дәл осылай әсер етеді деп есептеймін. «Дельта+» штамы туралы естіп жатырмыз. Бірақ оны Дүниежүзілік денсаулық сақтау ұйымы әлі ресми растамағандықтан, әзірге дельта штамы деп жалпы атаумен қарау жөн деп ойлаймын», – деді иммунолог.
Еске салсақ, бұған дейін Қазақстанда кімдер вакцинациядан босатылатыны айтылған еді.
Өзге де жаңалықтарды оқу үшін Telegram арнамызға жазылыңыз!