Кене. Көрнекі фото: Рixabay.com
Қызылорда облысында Конго-Қырым қанды безгегінен тағы бір адам көз жұмды, деп хабарлайды ҚазАқпарат. Агенттіктің хабарлауынша, Конго-Қырым қанды безгегінен қайтыс болған адам Шиелі ауданына қарасты Н.Бекежанов ауылының 32 жастағы тұрғыны. Бұл – өңірде аталған диагноздан көз жұмған үшінші адам. «Жыл басынан облыс бойынша Конго-Қырым қанды безгегіне шалдығу күдігіне байланысты 29 жағдай тіркелді. Олардың арасынан 10-ы клиникалық-зертханалық және эпидемиологиялық жолмен нақтыланды. Атап айтқанда, Қармақшы, Сырдария аудандары мен облыс орталығында – 1, Жанақорғанда – 5, Шиеліде 2 дерек анықталды. Былтыр 601 адам дәрігерлер қарауында болса, биыл олардың саны 712 адамды құрайды», – дейді облыстық Санитарлық-эпидемиологиялық бақылау департаменті басшысының орынбасары Әлия Әбдіқайымова. Еске салсақ, бұған дейін Қызылорда облысында кене шаққан екі адамның, Түркістан облысында бір баланың қайтыс болғанын хабарлаған едік. Олардың барлығы Конго-Қырым қанды безгегін жұқтырған. Мамандардың сөзінше, кене шаққан баланың өліміне медициналық көмекке кеш жүгінуі себеп болған.
Өзге де жаңалықтарды оқу үшін Telegram арнамызға жазылыңыз!