Жамбыл облыстық балалар ауруханасының хирургтары тоғыз айлық баланың ішегінен нәресте соскасын алып тастады. Бұл туралы Stan.kz ақпарат агенттігі хабарлайды.
Бөтен зат нәрестенің ішегінде бірнеше күн бойы болған. Дәрігерлер бастапқыда сосканы байқамапты.
Жамбыл облыстық денсаулық сақтау басқармасының мәліметінше, 9 айлық бала жедел жәрдеммен ауруханаға жеткізілген. Бала есінен танып, басын соғып алған. Артынша тоқтаусыз құсқан.
Педиатрлар науқасты қарап, бас миының жарақаты диагнозын қойды. Алайда баланың жағдайы жақсармай, кейін хирургтар кеңеске шақырылды.
Нәрестенің іш қуысы мүшелерін рентген және УДЗ түсіріліп, баланың ішегінде белгісіз заттың тіреліп тұрғаны белгілі болды..
Дәрігерлер баланың ойнап жүріп соска жұтып қойғанын анықтады. Науқасқа шұғыл түрде іш қуысына операция жасалды. Хирургиялық араласуды хирургия бөлімінің меңгерушісі Қанат Дүйсебаев, хирург Дәурен Бағыбаев және анестезиолог Еркін Тұраров жасады.
“Соска «қосалқы» ішектің ішінде орналасқан және асқазан-ішек жолдарының қалыпты жұмысына кедергі келтірді. Мамандар нысанды алып тастап, ішек жұмысын қалпына келтірді. Операциядан кейінгі бірінші күні сәби жансақтау бөлімінде болса, қазір хирургия бөлімінде ем қабылдап жатыр”, – деп хабарлайды денсаулық сақтау басқармасы.
Өзге де жаңалықтарды оқу үшін Telegram арнамызға жазылыңыз!