Биыл жарты жылда банктердің таза пайдасы 300 млрд теңгеден асты. Бұл туралы ҚР Қаржы нарығын реттеу және дамыту агенттігінен мәлім болды.
«2022 жылғы 1 шілдедегі жағдай бойынша банк секторының жеткілікті капитал қоры бар. Негізгі капиталдың жеткіліктілік коэффициенті (к1) – 16,4 пайыз, меншікті капиталдың жеткіліктілік коэффициенті (к2) – 19,8 пайыз болды. Бұл жүйе бойынша орташа алғанда заңнамада белгіленген нормативтерден едәуір асады», – делінген агенттік мәліметінде.
2022 жылғы қаңтар-маусымда банктердің таза пайдасы 355 млрд теңгені құрады. Бұл көрсеткіш 2021 жылғы осы кезеңімен салыстырғанда 46,2 пайызға төмен.
«Банк активтерінің рентабельділігі (ROA) 2022 жылғы 1 шілдеде 2,7 пайызды (2021 жылғы 1 шілдеде – 3,2%), капиталдың рентабельділігі (ROE) 21,9 пайызды (2021 жылғы 1 шілдеде – 25,9%) құрады», – деп аталып өткен хабарламада.
Бұдан бұрын хабарланғандай, 2022 жылғы 1 шілдедегі жағдай бойынша Қазақстан Республикасының банк секторында 22 екінші деңгейдегі банк бар.
Өзге де жаңалықтарды оқу үшін Telegram арнамызға жазылыңыз!