Мем­ле­кет бас­шысы Қасым-Жомарт Тоқаев VIII сай­­лан­ған Парламенттің бірінші сес­сия­сының ашылуына қатысты. Ел Президенті онда көптеген мәселелерге тоқталды. Ел экономикасын арттыру, ауылды дамыту бағытындағы түрлі бағдар­ла­малардың қолға алынып, жаңа Қазақстанның даму жолындағы айқын қадамдарын жеткізді.
– Ел жастары әрдайым менің айрықша назарымда екені баршаға мәлім. Мен билікке ойы озық, білімді жастар келуі керек деп үнемі айтамын. Өскелең ұрпақты ел ісіне баулу – өте маңызды мәселе. Олар қоғамға жаңа құндылықтар әкелуге тиіс. Сайлау кезінде жас кандидаттар бірігіп, өз тобын құрғаны белгілі. Осы одақтың белсенді мүшелері Парламентке және мәслихаттарға өтті. Осылайша, өкілді билік тармағына саясаткерлердің жаңа буыны келіп жатыр. Жастар мұны елімізді дамытуға берілген бірегей мүмкіндік деп бағалауы қажет, – деді Қасым-Жомарт Кемелұлы.
Сонымен қатар ел Президенті сайлау алдында ауылдағы кәсіпкерлікті дамыту қажеттігі туралы айтқанын еске салды. Ел дамуы жолындағы ең басты бағыттардың бірі ретінде бұл салаға баса назар аударылған. «Оны ауыл шаруашылығы кооперациясы арқылы жүзеге асыру керек. Сол үшін «Ауыл аманаты» жобасы қолға алынады. Ауыл тұрғындарына 5-7 жылға жылдық өсімі 2,5 пайыз болатын шағын несие беріледі. Ауыл шаруашылығы кооперативтері халыққа қызмет көрсету және өнім өткізу үшін құрылады. Оларға құрал-жабдық және техника сатып алу үшін субсидия беріледі. Осы мақсатқа 1 триллионға жуық теңге бөлінеді» деп тоқталып өтті.
Әлбетте, қоғамның қай саласында болса да жастардың үлес салмағы басым. Қоғамның қозғаушы күші деген атқа ие болған қатардың әсіресе, білім, медицина салаларында ерекше орны бар. Бұл ретте Қасым-Жомарт Кемелұлы аталған салалардың маңызын арттыруда Президенттік жастар кадрлық резервін үлгі ету керегін айтты.
– Білім беру саласында ұстаз – ең басты тұлға. Оның қоғамдағы абырой-беделін арттыра беруіміз керек. Алайда мұғалімдердің, директорлардың және педагогикалық оқу орындары түлектерінің көпшілігі Ұлттық біліктілік емтиханынан өте алмады. Маған кейбір тәжірибелі ұстаздар тиісті министрлік дайындаған тапсырмалар тым күрделі деп ша­ғым­данды. Бәлкім, оны жеңілдету, жетілдіру керек шығар. Бұл салада қатып қалған қатаң ереже болмауы керек. Бірақ негізі, ұстаздарға қойылатын талап жоғары болуға тиіс. Мұғалім тапшылығын желеу етіп, мектепке кез-келген адамды жұмысқа ала беруге бол­майды. Мұндай әрекет ұстаздардың біліктілік деңгейін күрт төмендетеді. Бі­лім беру жүйесіндегі ме­нед­жментті жақсартуға баса мән берілуге тиіс. Осы салаға нағыз кәсіби мамандарды тарту қажет. Бізде Президенттік жастар кадр резерві бар. Дәл сол сияқты білім саласына өзгеріс әкелетін мың маман арнайы дайындықтан өтетін болады. Осыған орай тиісті бағдарлама қабылданады. Кадр мәселесі жоғары білім беру жүйесі үшін де өте өзекті, – деді Президент.

«АЖ» ақпарат

 

Өзге де жаңалықтарды оқу үшін Telegram арнамызға жазылыңыз!