Әлеуметтік желіде экологиялық тақырыпта пайдалы жазбаларымен, қоғам ісінде айрықша белсенділігімен танымал, кәсіпкер, облыстық қоғамдық кеңес мүшесі, Халықаралық Табиғи уақыт қолдаушылар Альянсының Қазақстандағы өкілі Болат Нұрхожаевтың танымдық, ғылыми-көпшілік бұл кітабы адам өмірі үшін аса маңызды. Хронобиология жайында қазақ тілінде құнды ақпарат беретін алғашқы жинақ ретінде құнды.

Халықаралық Табиғи уақыт қолдау­шылар Альянсының Қа­зақстандағы өкілі Болат Нұрхо­­жаевтың танымдық, ғы­лы­ми-көпшілік кітабы­ның тұсау­ке­сері өтті.
«Хронобиология: біз неге тіріміз?» деп аталатын кітап адамзат өмірі үшін аса маңызды хронобиология ғылымы жайында қазақ тілінде жазылған алғашқы жинақ. Әлеуметтік желіде экологиялық тақырыпты қаузап жүрген Болат Жолтайұлы Қызылорда облысы уақытын қайтару қаулысының қабылда­нуына үлес қосқан азамат. Ол бүгінде ҚР Уақыт өлшемін түбегейлі реттеу ведомство­аралық жұмыс тобының, сонымен қатар облыстық қоғамдық кеңес мүшесі, Экология комис­сиясының төрағасы, облыстық кәсіпкер­лер палатасы кәсіп­керлер құқын қорғау кеңесінің төрағасы, Өңірлік кәсіпкерлер кеңесінің, халықаралық Табиғи уақыт қолдаушылар Альянсының Қазақстандағы өкілі. Экология саласына қосқан үлесі үшін Экология министрлігі, Бас прокуратура, облыс, қала әкімі медальдары мен құрмет грамоталарының иегері.
Құнды кітаптың тұсаукесер рәсіміне Қорқыт ата университетінің ғалымдары, облыстық денсаулық сақтау, білім беру саласының мамандары, қоғам белсенділері қатысты.
Кітап мазмұнын қамтыған табиғи уақыт пен адамның биологиялық ырғағының сәйкестігі, сағаттық белдеулер, уақыт өлшемдері, ұйқы режимі, хроноцид пен десинхроноз, т.б. мәселелер оқырманды ойландырады.
«Туған сәттен бастап біз ғаламдық, яғни табиғи ырғақ әсерімен қалыптасып өмір сүреміз. Сондықтан кездейсоқтық ойыншығы болмас үшін табиғи ырғақпен сәйкестікті сақтауымыз қажет. Мұны түсінуге, білуге бұл кітаптың көмегі зор болады деп санаймын» деп баға береді Қазақ Ғылым академиясының корреспондент мүшесі, әл-Фараби атындағы Қазақ Ұлттық университеті Биофизика және биомедицина кафедрасының меңгерушісі, биология ғылымдарының докторы, профессор Сұлтан Төлеуханов.
«Б.Ж.Нұрхожаев – еліміздегі әкімшілік және табиғи уақыт белдеуінің тұрғындар денсаулығына әсері аясында көтеріліп отыратын көптеген мәселелердің басы-қасында белсенділік танытып жүрген тұлға. Атап айтсақ, Қызыл­орда, Қостанай, облыс­тары бойынша сағаттық белдеу мәселелерін шешу мақсатында құрылған ҚР Үкіметінің жұмыс тобының белсенді мүшесі. Бұл еңбегі – осы бағытта атқарылған қажырлы еңбегінің жемісі деп айтуға болады» дейді Генетика және физиология институтының жетекші ғылыми қызметкері, биология ғылымдарының кандидаты Асқар Қалекешов.
Ғалымдар жоғары баға берген бұл кітап кітапхана сөресінде емес қолдан қолға көшіп жүретін пайдалы еңбек боларына сенеміз.
Кітап «ASU баспа үйінен» жарық көрген.
Автор «Хронобиология: біз неге тіріміз» кітабы жайында шағын баяндама жасады. Кітаптың тұсаукесер рәсімінен соң қоғам қайраткері, Т.Жүргенов атындағы Қордың директоры Сәпен Аңсатов, «Ақмешіт ақшамы» газетінің бас редакторы Сәрсенкүл Бихожа, «Тіл сақшысы» газетінің бас редакторы Сәдуақас Аңсатов, облыстық денсаулық сақтау басқармасы басшысының орынбасары Жангелді Шайымбетов, Қорқыт ата атындағы Қызылорда университетінің проректоры Майнұр Бөрібаева, облыстық кәсіпкерлер палатасының директоры Пірмұхаммед Сыздықов арнайы сөз сөйледі.
«Мен өзім адамның биологиялық ырғағы деген тақырыпқа оқушы кезімнен қызығатындықтан бұл кітаптың оқырман үшін қаншалықты маңызды екенін жақсы түсініп отырмын. Мұндай ғылыми-танымдық кітаптың қазақ тілінде жарық көруі де үлкен қуаныш. Әрі қарайғы уақытта бірлесіп жұмыс істеуге дайынбыз. Автордан бастап осы кітаптың шығуына атсалысқан барлық азаматтарға алғысымды білдіремін» деді облыстық денсаулық сақтау басқармасы басшысының орынбасары, медицина ғылымдарының докторы Жангелді Шайымбетов.
– Бұл кітапты оқып қоя салу аздық етеді. Кітапта жазылған негізгі қағидаларды күнделікті өмір салтымызға айналдыруымыз керек, – деді облыстық кәсіпкерлер палатасының директоры Пірмұхаммед Сыздықов .
Кітап авторы Болат Жолтайұлы 1966 жылы туған. Қызылорда политех­никумын, Астана Инженерлік-техникалық академиясын құрылысшы, эксперт бағалаушы мамандығы бойынша бітірген. Еңбек жолын Арал Кеме жөндеу зауытында жұмысшы, шебер болып бастаған. 1990 жылдардан бастап жеке кәсіпкерлікпен айналысады.
2022 жылы әл-Фараби атындағы Қазақ ғылыми зерттеу университетінде хронобиология мамандығы бойынша оқып, сертификатын алған.

 

Өзге де жаңалықтарды оқу үшін Telegram арнамызға жазылыңыз!