Фото: ашыұ дереккөзден
Сот жыл сайын әртүрлі дау мен мәселелерге байланысты түрлі шешім қабылдайды. Олардың кейбіреуі біздің елден тыс, яғни шетелден де талап етілуі мүмкін. Қандай да сот актісі ресми құжат мәртебесіне ие болу үшін, яғни ол шет мемлекетке жолданар алдында міндетті түрде заңдастырылады, апостиль қойылады.
Апостиль – заңдастырудың осындай нысанын танитын елдер аумағында ұсынуға арналған құжаттың заңдылығы туралы ақпаратты толтырудың халықаралық стандартталған нысаны. «Апостиль» мөрі құжаттардың түпнұсқалары мен көшірмелеріне қойылады.
Апостильденген құжат аттестациялауды немесе заңдастыруды талап етпейді және оны Конвенцияға қатысушы барлық мемлекеттің ресми органдары мойындайды. Апостильденген құжат шет мемлекеттерге жолданатын құжаттар және жолдаушы мемлекеттің имиджінің көрсеткіштерінің бірі болып табылады.
Сондай-ақ сот шешімдерін орындау әрі сот тапсырмаларын басқа елге жолдау кезінде, сол елмен Қазақстан арасында ешқандай келісім болмаса, ол ел Гаага конвенциясының қатысушысы болмаған жағдайда соттың құжаттарына апостиль қойылуы қажет.
Әлемнің көптеген елі, соның ішінде Қазақстан 1961 жылғы 5 қазанда Гаага конвенциясына қосылып, құжаттарды апостиль қою арқылы жеңілдетілген түрде заңдастыру мүмкіндігіне ие болды.
Қазақстан Республикасы Жоғарғы Сотының жанындағы сот қызметін қамтамасыз ету департаменті – сот органдарынан шығарылатын ресми құжаттарға апостиль қою өкілеттігіне ие мемлекеттік орган.
Апостиль – құжаттамаға қол қойған адамның қолын және оның өкiлеттiктерiн, сондай-ақ осы құжат бекiтiлген мөрдiң немесе мөртаңбаның түпнұсқалылығын растайтын арнайы мөртаңба.
Мемлекеттік көрсетілетін қызметті алу үшін жеке және заңды тұлғалар (көрсетілетін қызметті алушы) көрсетілетін қызметті берушіге «Азаматтарға арналған үкімет» мемлекеттік корпорациясы» КЕАҚ арқылы қағаз тасымалдаушыда не «электрондық үкіметтің» веб-порталы www.egov.kz сайты арқылы электронды түрде, не Қазақстан Республикасы Жоғарғы Сотының жанындағы Соттардың қызметін қамтамасыз ету департаментінің (ҚР Жоғарғы Сотының аппаратының) кеңсесі арқылы осы Қағидаларға сәйкес нысан бойынша апостиль береді.
Қызмет көрсету тәртібі, оның ішінде қызмет көрсету мерзімі, нысаны және нәтижелері көрсетілетін қызметті берушінің жұмыс кестесі, қызмет көрсетуге қажетті құжаттар тізімдемесі стандартпен реттеледі. Мемлекеттік қызмет стандартымен және апостиль қою үшін мемлекеттік бажды төлеу деректемелерімен Жоғарғы Соттың интернет-рессурсындағы «мемлекеттік қызмет» бөлімінен танысуға болады.
Мемлекеттік қызмет тізіліміне енгізілген өзгерістерге сәйкес Қызылорда облысы бойынша Соттар әкімшілігі РММ-сі Сот органдарынан шыққан ресми құжаттарды апостильдеу мемлекеттік қызмет көрсету бойынша құжаттарды қабылдауға және беруге уәкілетті. Құжаттарды апостильдеуге өтінім түскеннен кейін сот әкімшісінің жауапты қызметкері сот органдарынан шыққан ресми құжаттың шынайылығын, қол қоюшының қолының сәйкестігін, сот мөртаңбасының түпнұсқаға сәйкестігін, арнайы үлгілерге қарап, тексереді.
Еліміздің барлық өңірлерінде сот органдарынан шығатын ресми құжаттарға апостиль қою үшін сол өңірдің соттар әкімшісіне тікелей барып, немесе халыққа қызмет көрсету орталықтарының филиалдарына жүгінуге болады.
Ә.ЖАҚСЫЛЫҚОВ,
Қызылорда облысының қылмыстық істер жөніндегі мамандандырылған
ауданаралық сотының кеңсе меңгерушісі
Өзге де жаңалықтарды оқу үшін Telegram арнамызға жазылыңыз!