Жетісу облысының орталығындағы тұрғындар сапасыз жолға шағымданып жатыр. Жақында ғана басталған жол жөндеу жұмыстарын сапасыз деген талдықорғандықтар қала басшыларына наразы. Бұл туралы Stan.kz ақпарат агенттігі хабарлайды.
Жаңа ғасыр көшесінің тұрғындары жаңа жолды жылдар бойы армандап келген. Алайда мердігерлердің жолды сапасыз жөндеуіне куә болған қалалықтар, әлеуметтік желілерде өзінің шағымдарын айтып жатыр. Олардың сөзінше, асфальт төсеу барысында балшық қолданылып, заңға сәйкес технологиялар сақталынбаған.
Жағдайдың мән-жайын жан-жақты анықтау үшін Stan.kz тілшісі Талдықорған қаласының жолаушылар көлігі және автомобиль жолдары бөлімінің басшымен хабарласты. Қанат Хамитжановтың ақпаратына сүйенсек, көше құрылысы толықтай аяқталмаған.
«Жаңа ғасыр көшесінің Шахворостов және Тыныбаев көшесінің аралығын жөндеу жұмыстары жүргізілуде. Қазіргі уақытта жолдың ескі қабатын алу және қиыршық таспен негіздесемесін дайындау жұмыстары жүргізілуде. Содан кейін жаңа асфальт төсемесі салынатын болады. Мердігер ұйым «Марлен-А» ЖШС», – дейді бөлім басшысы.
Өзге де жаңалықтарды оқу үшін Telegram арнамызға жазылыңыз!