Қазақстан Республикасында борышкерге қатысты атқарушылық іс жүргізу барысында екі ауқымды шектеу шарасы қолданылады: ел аумағынан шығуға уақытша тыйым салу және лицензиялар, рұқсаттар, арнайы құқықтар беру немесе олардың қолданысын тоқтата тұру.

Бұл шаралар «Атқарушылық іс жүргізу және сот орындаушыларының мәртебесі туралы» Қазақстан Республикасы Заңының (бұдан әрі-Заң) 33, 34-баптарымен тікелей реттеледі.

Елден шығуға шектеу борышкер болып табылатын жеке тұлғаға және борышкер-заңды тұлға басшысына қойылады. Берешек сомасы 40 АЕК-ке тең және асатын атқару құжатының талабын орындалмаса, сот орындаушысының қаулысымен шекарадан өтуге тыйым салынады. Сот орындаушысының Қазақстан Республикасынан шығуды уақытша шектеу туралы қаулылары атқарушылық іс жүргізудің мемлекеттік автоматтандырылған ақпараттық жүйесі арқылы Қазақстан Республикасы Ұлттық қауіпсіздік комитетінің Шекара қызметіне орындау үшін жіберіледі. Қаулы электронды жүйе арқылы автоматты түрде жеткізіледі.

Борышкер:

– жеке тұлғадан екі жүз елу айлық есептік көрсеткіштен астам соманы өндіріп алу туралы;

– заңды тұлғадан бір мың екі жүз елу айлық есептік көрсеткіштен астам соманы өндіріп алу туралы;

– мүліктік емес сипаттағы атқарушылық құжатты дәлелсіз себептермен орындамаған жағдайда – сот орындаушысы осы Заңның 39-бабында көзделген орындау мерзімі өткеннен кейін, ал алименттер өндіріп алу туралы атқарушылық құжаттар бойынша берешек жиналып қалған жағдайда борышкерге лицензиялар, рұқсаттар және арнайы құқықтар беруге уақытша тыйым салу туралы, сондай-ақ борышкерге бұрын берілген лицензиялардың, рұқсаттар мен арнайы құқықтардың қолданылуын тоқтата тұру туралы сотқа ұсыныс жібереді. Сот ұсынысты Қазақстан Республикасының азаматтық іс жүргізу заңнамасында белгіленген тәртіппен қарайды. Сот орындаушысының ұсынысын қарау нәтижелері бойынша шығарылған сот ұйғарымының көшірмелері борышкерге және орындау үшін тиісті уәкілетті органдарға жіберіледі.

Осы шаралар борышкерді борышты тез арада өтеуге мәжбүрлейтін өте тиімді құрал болып саналады.

Ғ.Сұлтанова,
Қызылорда облысы Әділет
департаментінің «Арал ауданаралық мәжбүрлеп орындату аумақтық бөлімі» филиалының басшысы-аға сот орындаушысы.

 

Өзге де жаңалықтарды оқу үшін Telegram арнамызға жазылыңыз!