Қорқыт ата атындағы Қызылорда университетінде Қазақстан Республикасы Конституциясының 30 жылдығына арналған «Ата Заң – халық бірлігі мен ел тұрақтылығының кепілі» атты дөңгелек үстел өтті.
Жиынға университеттің Басқарма Төрағасы – Ректор Бейбіткүл Каримова қатысып, барша дөңгелек үстелге қатысушыларды айтулы мерекемен құттықтады.
«Қазақстан Конституциясы біздің ата-бабамыздың ғасырлар бойғы аңсаған тәуелсіз ел туралы армандарының жүзеге асқанының құқықтық бейнесі. Еліміздің өркениетті елдердің қатарынан тұрақты орын алуына Ата заңымыздың құқықтық әлеуеті жеткілікті. Сондықтан да егемен еліміздің баянды болашағын қамтамасыз ету үшін Конституциямыздың әрбір бабын құрметтеу, заңнамалық, нормативтік құжаттарды орындау – әрбір Қазақстан азаматының парызы. Конституциямыз заманның сындарлы талабына лайықты жауап беріп, елді дамыту ісіндегі зор әлеуетін жарқын дәлелдеп келеді»,- деді Бейбіткүл Сәрсемханқызы.
Кездесуде Қызылорда облыстық сотының қылмыстық істер жөніндегі сот алқасының төрағасы Жанат Бекжанов, философия және әлеуметтік-гуманитарлық пәндер секциясының аға оқытушысы, саяси ғылымдарының кандидаты Ербол Абенов, «Құқықтану» білім беру бағдарламасының қауымдастырылған профессор міндетін атқарушы, философия докторы Айнұр Исаева, «Тарих және археология» БББның қауымдастырылған профессор міндетін атқарушы, философия докторы Талғат Жолдасұлы баяндама жасады.
Ғалымдар Конституцияға 30 жыл ішінде енгізілген толықтыруларға кеңінен тоқталып, адамдар құқығының қорғалуы, заң үстемдігі турасындағы мәселелерді талқыға салды. Сондай-ақ, шетелдегі заңдар жүйесінің ерекшеліктерін жеткізді.
Жиынға профессор-оқытушылар құрамы қатысып, конференция соңында өзара пікір алмасты. Сонымен қатар, Конституцияның қағидаттарын насихаттау арқылы заңға құрметпен қарау мен азаматтық белсенділікті арттыру жолдары талқыланды.
Өзге де жаңалықтарды оқу үшін Telegram арнамызға жазылыңыз!