Кейінгі уақытта елді еліктірген, бала тұрмақ, үлкенді де өзіне телмірткен – «Labubu» ойыншығы тағы да бір трендке айналды. Бір қарағанда қолтырауын мен мысықтың арасындағы әлдебір жаратылыс. Тіпті оны құбыжық деуге де ауыз бармайды: шошытпайды, бірақ жұбатпайды да. Қызығы сол – адамдар оны кез келген жерден іздеп, кез келген бағасына сатып алып, аксессуар ретінде қолданып жүр. Бұл – жай ғана ойыншық па, әлде заманның бет- бейнесін көрсете білген тағы да бір «айна» ма?
Бүгінде адам баласының қызығушылығын желдің өтіндегі қауырсынға ұқсатуға болады. Яғни қай жақтан жел соқса, соған қарай ұша жөнеледі. Бір күні бәрі бірге дофамин қуалап, желіде не зат трендке айналса, соны алғанша тыным таппайды. Мұны қарапайым әуестік деп атау қиын, себебі бұл – жаппай еліктеушілік. Адамдар әлдебір дүниенің неге танымал екенін емес, бәрі қызығып жатқанын ғана көріп, ойланбастан сол ағысқа ілесіп кетуді әдетке айналдырды.
Баяғының ауыл баласы бір уыс топырақты илеп, ит-құспен ойнап өсуші еді. Қиялы таза, ойы мөлдір, шоқпыт киім киіп шоқтай жанатын сол күндерден алыстап кеткеніміз қашан! Ал қазір бала тұрмақ, үлкеннің өзі «құбыжыққа» құмар…
«Labubu» феномені – соның дәлелі. Оны көргенде ойланасың: расымен сүйкімді ме өзі? Әлде бізге біреулер оның сүйкімді екенін санамызға құйып берді ме? Ақылдан бұрын эмоцияға жүгінетін адам маркетингтің ең оңай құрбаны. Елден қалмайын деп жүргенде қалай сан соққанын аңғармайды. Ал «ақылдылар» өз кәсібін дөңгелетіп, қаражатты қалай қомақты етудің жаңа жолын ойластыра береді.
Балалар мен ересектер бүгінде бұл құбыжық ойыншықты трендте мықтап ұстап отыр. Тісі ырсиған, көзі шарасынан шыға жаздап тұрған, қуыршақ деуге аузың бармайтын бұл бейнеге баладан бұрын ата-ана «ғашық». Ерекше трендке айналған «Labubu»-дің бағасы да естен тандырады: 135 мың теңге. Базардағы қарапайым қуыршақтың құнынан жүз есе қымбат. Әуеліде мұндай жетістікке жете қоймаса да, кейіннен аталған тауар әп сәтте-ақ «sold out» дәрежесіне лезде жетуді шығарды.
«Labubu» – қытайлық «Pop Mart» компаниясының туындысы. Әр қуыршақ қорабы жабық күйде сатылады, ішінде не барын ашпайынша білмейсің – бұл «сюрприз эффектісі» сатып алушыны одан сайын қызықтыра түседі. Көңілі қалаған кейіпкері шықпаған жан тағы да сатып алады. Осылайша, маркетингтің құрбаны болғанын аңғармай да қалады.
Маркетинг майданында ойнайтындар жақсы біледі: адамның сезімін оятып, қорқыныш пен елігуді қатар қозғаса, ол кез келген дүниеге қол жеткізуге дайын. «Қазір алмасаң, ертең болмайды», «бәрінде бар», «лимитпен шығады» деген сөздер – қарапайым алдау әдісі. Бірақ осы бір психологиялық шабуылдан көп адам сытылып шыға алмай отыр. Қоғамның әлсіз тұсы да – осы: өз сөзі, өз пікірі, өз таңдауы жоқ.
Қоғам өзіне сұрақ қоюы керек: біз нені шын жақсы көріп, нені шын қажет етіп жүрміз? Әлде бәрі жалған қызығушылық па? Егер біз әр жаңа шыққан заттың артынан жүгіре берсек, біркүні нағыз құнды дүниелерден айырылып қаламыз. Бұл да рухани құлдыраудың бір дәлелі екенін аңғарайық.
Бір елі ауызға екі елі қақпақ керек. Өскелең ұрпақтың ой-санасына серпін беру үшін, ең алдымен, талғамымызға тоқтау салғанымыз абзал. Ертеңнің бүгіннен басталатынын ұмытпайық, құрметті оқырман.
Қорлан САРЫ
Өзге де жаңалықтарды оқу үшін Telegram арнамызға жазылыңыз!