Кеше облыс әкімі Гүлшара Әбдіқалықованың төрағалығымен сыбайлас жемқорлыққа қарсы іс-қимыл мәселелері жөніндегі облыстық комиссия отырысы өтті.
Күн тәртібінде «Бизнес қоғамдастығы мен мемлекеттік органдар арасында тиімді әріптестікті дамыту үшін қолайлы жағдайлар жасау» және «Құрылыс қызметі саласында сыбайлас жемқорлық көріністеріне жол бермеу туралы» мәселелер қаралды. Алғашқы мәселе бойынша облыстық кәсіпкерлер палатасы директорының міндетін атқарушы Пірмұхаммед Сыздықов пен облыстық кәсіпкерлік және туризм басқармасының басшысы Фердоуси Қожабергенов баяндады.
– Өткен жылдан бері «Бизнестің жол картасы – 2025» мемлекеттік бағдарламасы аясында кәсіпкерлермен банктерге несие алуға өтінім жолдау және шешімін алу тәртібі банк менеджерлерінің қатысуынсыз автоматтандырылған «скоринг» бағдарламасына ауыстырылды. Жаңа жүйе арқылы кәсіпкерлерге несие беру жөнінде шешім қосымша құжат сұратусыз 10-15 минут уақыт ішінде жасалады. Биыл бағдарлама аясында 7,9 млрд теңгеге несиелендірілген 666 жобаның ішінде 2,5 млрд теңгені құрайтын 528 жобаға мақұлдама «скоринг» бағдарламасымен берілген, – деді басқарма басшысы Фердоуси Қожабергенов.
Облыс басшысы әкімшілік кедергілерді азайтуда кәсіпкерлік және туризм басқармасы мүдделі мемлекеттік органдармен бірлесіп жұмыс атқару қажеттігін айтты.
– Пандемияға қарамастан, аймақтағы кәсіпкерлік субъектілеріне бірқатар әлеуметтік жеңілдіктер көрсетіліп келеді. Қазіргі жағдайда тіркелген шағын және орта кәсіп субъектілерінің саны 7,7%-ке ұлғайды. Тұрақты жұмыс жасап тұрған кәсіпкерлердің саны 7,5 процентке өсті. 2021 жылы мемлекеттік бағдарламалар аясында шағын және орта бизнесті қаржылай қолдау үшін бюджеттен 8,1 млрд теңге бөлінді. Бірақ соған қарамастан, әлі де болса, әкімшілік кедергілердің бары рас. Сондықтан облыстық кәсіпкерлік және туризм басқармасы мүдделі мемлекеттік органдармен бірлесіп, мемлекеттік бағдарламалар арқылы жеке кәсіпкерлік субъектілерін қолдау шараларын қамтамасыз етуі тиіс. Кәсіпкерлікті қолдау және қорғау үшін әкімшілік кедергілерді азайту бойынша мемлекеттік органдардың функцияларына мониторинг жүргізсін, – деді облыс әкімі.
Мұнан соң екінші мәселе бойынша облыстық құрылыс, сәулет және қала құрылысы басқармасының басшысы Бердияр Пірімбетов пен облыстық жолаушылар көлігі және автомобиль жолдары басқармасының басшысы Мұрат Тілеумбетов мәлімдеме жасады. Басқарма басшылары сыбайлас жемқорлық тәуекелдеріне ішкі талдау жүргізудің үлгілік қағидаларына сәйкес заң бұзушылықты болдырмау, құрылыс саласына бөлінген қаражатты мақсатты әрі тиімді жұмсау, қаржы игеруді жоспарлау және құрылыс нысандарының бекітілген жобаға сәйкес жүргізілуі қатаң бақылауға алынғандығын жеткізді.
Облыс әкімі басқарма басшысы Бердияр Пірімбетовке жүргізіліп жатқан құрылыс объектілерін қолданыстағы заңнамаларға сәйкес уақытында аяқтауды, құрылыс компанияларын ашық іріктеу және олар жүргізетін жұмыстарға бақылау жасауды және мердігер мен тапсырыс берушілерге бақылау жүргізу мүмкіндіктерін қарастыруды жүктеді. Ал, Мұрат Тілеумбетовке автомобиль жолдарына қатысты анықталған кемшіліктерді қалпына келтіруді, Қызылорда қаласы және аудан әкімдерімен бірлесіп жол құрылысының сапасына қатысты кемшіліктерге жол берген тұлғалардың жауапкершілігін қарауды тапсырды.
Өзге де жаңалықтарды оқу үшін Telegram арнамызға жазылыңыз!