"Қызылорда ОПД ЕҚҚІҚБ тарапынан жарияланған байқауға"
Есірткі туралы ертегі
Баяғы заманда, бірақ дәл қазіргі күндерге ұқсас бір елде, Айдын есімді жігіт өмір сүріпті. Ол ақылды, өнерлі, жүрегі кең жігіт болыпты. Әсіресе,гитарада ойнап, ән айтқанды жақсы көреді екен. Бірақ оның өмірі оңай болмапты. Достары теріс айналып, ата-анасы үнемі ренжіп жүріпті. Оған армандары біртіндеп алыстай бергендей көрініпті.
Бір күні Айдын қала көшелерінде қыдырып жүріп, ерекше үйді көзі шалады. Үйдің сырты жарқырап, әдемі музыка ойнап тұрды. Үйдің қақпасында: “Бақыт пен рахат осы жерде!” деген үлкен жазу жазылыпты. Айдын қызығып, ішке кіреді. Үйдің ішінде бәрі ерекше әдемі еді: түрлі шамдар жарқырап, әсем музыка естіліп, адамдар көңілді билеп жүр. Айдынға бір жігіт жақындап келеді. Оның аты Жұлдыз екен.
– Қош келдің, досым! Мұнда бәрі өздерін еркін сезінеді. Сен де уайымдарыңды ұмытқың келсе, бізбен бірге бол, – дейді ол.
– Бірақ қалай? Менің көңіл-күйім жоқ, қайғы басып жүрмін, – дейді Айдын.
– Еш уайымдама! Мына сиқырлы ұнтақты байқап көр. Ол барлық қайғыңды жояды, – деп, Жұлдыз қолына кішкентай қапшық ұстады.
Айдын алғашында күмәнданады, бірақ айналасындағы адамдардың бәрі бұл ұнтақты мақтап жатты. Ол бір рет сынап көреді. Сол сәтте ол өз өмірін ең жеңіл, әрі бақытты сезінді. Бәрі жарқырап, қиындықтар мүлде жоғалып кеткендей болды.
– Бұл нағыз сиқыр ғой! Мен мұны тағы да сезінгім келеді, – деді Айдын. Осылайша, Айдын күн сайын сол “сиқырды” іздей бастады. Ол Жұлдызға қайта-қайта келіп, ұнтақты сатып алатын. Бірақ бірте-бірте оның әлемі өзгере бастады. Әлемнің жарқыраған түстері көмескіленіп, музыка да мұңлы болып кетті. Оның денесі әлсізденіп, достары мен отбасы одан тіпті алыстап кетті.
Бір күні ол сол үйдің бұрышында жалғыз отырды. Оның жүзі солғын тартып, көзі мұңға толы еді.
Сол кезде қасына бір ақсақал келіп:
– Балам, бұл жерде не істеп отырсың? – деп сұрады. Айдын оған болған оқиғаны айтып берді. Ақсақал терең күрсініп:
– Есірткі – алдамшы. Ол сенің бақытты сезінуіңді уәде етеді, бірақ шын мәнінде сенің өміріңді ұрлайды. Бұл үй – тәтті тұзақ қана. Бірақ бұл тұзақтан шығуға болады. Сенің қолыңнан келеді, балам, – деді.
Айдын ақсақалдың сөзін тыңдап, өзінің өмірін қайта қолға алуға шешім қабылдайды. Ол “сиқырлы ұнтақты” тастап, көмек сұрады. Бастапқыда бұл жол қиын болды, бірақ уақыт өте оның денсаулығы жақсарып, өмірі қалпына келді. Ол гитарасын қайта алып, жаңа әндер жаза бастады. Айдын енді өз оқиғасын басқа жастарға айтып жүрді. Ол әрдайым:
– Шынайы бақытты ешқашан жалған жолдардан таба алмайсың. Өміріңді қорға, арманды таңда, – деп, ескертетін.
Содан бері ол есірткінің тұзағына түскісі келетіндерді сақтап, оларға шынайы бақытқа жету жолын үйретті.
#есірткітуралыертегі Тұрманова Жанель Қызылорда қаласы 290 орта мектептің 7а-сынып оқушысы
Өзге де жаңалықтарды оқу үшін Telegram арнамызға жазылыңыз!