SMARTNEWS.KZ басылымының хабарлауынша, Қазақстанда қытайлық көліктерді жеткіземіз деп уәде берген жеке автодилердің әрекеті салдарынан шамамен 60 адам 1,2 млрд теңгесінен айырылды. Тапсырыс берушілер ақша аударған, бірақ машиналарын ала алмаған. Компания менеджерлері хабарласуды доғарған, ал фирма иесі шетелге қашып кеткені айтылуда.
Соңғы бір апта ішінде автосалон толық босап қалған: ғимараттағы көліктер де, құрал-жабдық та жоғалып, есікке пломба қойылған.
Алданғандардың бірі – Илья Погожев. Ол жұбайымен бірге үш жыл бойы 12 миллион теңгеге қытай кроссоверін алмақ болып ақша жинаған. Автодилер бағаны төмендетеміз деп машинаны Хоргостан тікелей әкелуге ұсыныс жасаған. Бірақ екі ай өтсе де көлік жетпеген.
Погожевтің айтуынша, компанияның негізін қалаушы Б.Е. алғашқы кезде байланысқа шығып, кедендегі «қиындықтарды» сылтауратып жүрген. Ал өткен аптадан бері ол телефонға жауап бермейді.
Жеті қалада тұратын жәбірленушілер ақшаларын қайтаруға тырысқанымен, менеджерлер үнсіз кеткен. Фирма иесінің Стамбулда жүргені туралы деректер айтылғанымен, полиция бұл ақпаратты растамайды.
Полиция Жетісу ауданында Қылмыстық кодекстің 190-бабы, 4-бөлігі бойынша «ірі көлемдегі алаяқтық» дерегімен іс қозғағанын мәлімдеді. Қазір толық әрі объективті тергеу жүргізілуде. Қорытындысына қарай процессуалдық шешім қабылданады.
Бұл жағдай көрші автосалонның да беделіне нұқсан келтірген. Бір аумақта орналасқан екі компанияны клиенттер жиі шатастыра бастаған.
Алданған азаматтар жаңа көлікті күткенді баяғыда қойған. Ендігі үміт – ақшаларын қайтарып алу және жоқ көліктерге рәсімдеген несиелерін қалай жабуды ойлау.
Өзге де жаңалықтарды оқу үшін Telegram арнамызға жазылыңыз!