SMARTNEWS.KZ басылымының хабарлауынша, ғалымдар Жерді көктемдегі алғашқы ұзақ магниттік дауыл басқанын хабарлады. Мамандардың айтуынша, ғарыштағы бұл құбылыс бірнеше сағат бойы әлсіремей жалғасып жатыр.
Ғылыми деректерге сәйкес, бұл – наурыз айындағы екінші магниттік дауыл. Алайда осы жолғысы ай ішінде алғаш рет айқын сезілген құбылыс ретінде тіркелген.
Мамандардың мәліметінше, геомагниттік ауытқулар түн ортасына қарай басталған. Ұзақ уақыт бойы олардың деңгейі тұрақты күйде сақталған. Мұндай өзгеріске Күндегі «короналық тесік» себеп болған.
Дәл осы аймақта Күн желінің жылдамдығы күрт өсіп, Жердің магнит өрісіне қысымды күшейткен. Ғалымдардың есебінше, қазіргі уақытта Күн желінің жылдамдығы шамамен секундына 700 шақырымға жеткен. Ал қалыпты кезеңде бұл көрсеткіш 300–400 шақырым шамасында болады.
Алдын ала болжам бойынша, геомагниттік тұрақсыздық екі-үш тәулікке дейін жалғасуы мүмкін. Сондықтан жақын күндері ғарыштық «ауа райы» толық тынышталады деп айту қиын. Дегенмен кейбір уақыт аралығында жағдай уақытша тұрақталуы ықтимал.
Мұндай деңгейдегі магниттік дауылдар әдетте орташа санатқа жатады. Соған қарамастан олар энергетикалық жүйелердің жұмысына және жоғары ендіктердегі радиобайланысқа әсер етуі мүмкін.
Өзге де жаңалықтарды оқу үшін Telegram арнамызға жазылыңыз!