Фото: icehockey.kz
Бүгін, 12 мамырда шайбалы хоккейден әлем чемпионаты элиталық дивизионында Қазақстан құрамасы екінші кездесуінде Словакияға қарсы ойнайды. Бұл туралы KAZINFORM ақпарат агенттігі хабарлайды.
Дүбірлі дода 10-26 мамыр аралығында Чехияның Прага және Острава қалаларында өтеді.
Қазақстандық хоккейшілер В тобында Франция, Словакия, Латвия, Швеция, Германия, АҚШ және Польшамен сынға түседі.
Қазақстан мен Словакия кездесуі бүгін, 12 мамырда сағат 15.20-де басталып, «Qazsport» телеарнасынан тікелей эфирде көрсетіледі.
Екі құрама бұған дейін 9 мәрте кездесті. Оның 2-уі Қазақстанның басымдығымен аяқталса, қалғанында қарсыласына есе жіберді.
Одан кейін ел құрамасы 14 мамырда Латвия, 16 мамырда Швеция, 17 мамырда Германия, 19 мамырда АҚШ, 20 мамырда Польша хоккейшілерімен шеберлік байқасады.
Айта кетсек, бүгін В тобында Латвия мен Франция, Швеция мен Польша ойнаса, А тобында Дания мен Канада, Австрия мен Швейцария, Финляндия мен Ұлыбритания мұз айдынға шығады.
Айта кетсек, бұдан бұрын 11 мамырда қазақстандық хоккейшілер Францияны 3:1 есебімен жеңіп кетті.
Бұл күні аталған топта Латвия Польшаны овертаймда 5:4, АҚШ Германияны 6:1 есебімен тізе бүктірді.
Қазір турнир кестесінде Швеция, Қазақстан, АҚШ, Германия үш, Лавтия екі, Польша бір ұпайдан еншілесе, Словакия мен Франция бірде-бір ұпайға қол жеткізген жоқ.
Сондай-ақ, А тобында 11 мамырда Дания Австрияны 5:1, Чехия Норвегияны 6:3, Канада Ұлыбританияны 4:2 есебімен жеңді.
Өзге де жаңалықтарды оқу үшін Telegram арнамызға жазылыңыз!