Фото: ҚТФ
Қазақстанның екінші, әлемнің 72-ракеткасы Юлия Путинцева жұптық сында Чарльстон (АҚШ) WTA 500 турнирінің жартылай финалына жолдама алды, деп хабарлайды KAZINFORM.
Қазақстандық теннисші италиялық Элизабетта Кочареттомен бірге ширек финалда грузиялық Екатерина Горгодзе – мексикалық Рената Сарасуаның мысын басты.
Бірінші партия грузиялық-мексикалық жұптың пайдасына шешілді – 6:3. Бұдан кейін Путинцева – Кочаретто камбэк жасай білді – 7:5, 10:7.
Бір сағат 42 минутқа созылған тартысты бәсекеде қазақстандық-италиялық дуэт эйс жасамағанымен, 7 брейктің үшеуін құр жіберген жоқ. Горгодзе – Сарасуа 4 брейкпен (12 брейк-пойнт) көзге түсті.
Юлия Путинцева – Элизабетта Кочаретто финалға шығу үшін америкалықтар Дезире Кравчик – Кэти Макналлимен таласады. Америкалық жұп ширек финалда жарыстың 1-ракеткалары, сербиялық Александра Крунич – қытайлық Чжан Шуайды жеңіп кетті – 6:1, 7:5.
Өзге де жаңалықтарды оқу үшін Telegram арнамызға жазылыңыз!