Бүгінде облыста 15 мыңға жуық адам теннисті жанына серік етіп, тұрақты түрде айналысады. Тиісінше, өңірде дәл осы спорт түріне қызығушылық танытатындардың саны жылдан жылға көбейіп келеді. Осыған байланысты өңірде заманауи үлгіде салынған теннис орталықтары спорт сүйер қауымға сапалы қызмет көрсетуде.
Соның бірі – 2012 жылы пайдалануға берілген «Нұрсәт» теннис орталығы. Аталмыш орталықтың жалпы ауданы – 1715,2 шаршы метр. Спорт кешенінде тенниспен айналысушыларға барлық мүмкіндік қарастырылған. Сондай-ақ 2022 жылы теннис орталығы жанынан жазғы теннис корты пайдалануға берілген болатын. Бұл нысанның жалпы ені – 45, ұзындығы – 90 метр. Ғимаратта 4 теннис корты орналасқан. Теннис бөлімшесінде 5 жаттықтырушы-оқытушы 200-ден астам спортшыны кәсіби бағытта үйретуде.
Жастардың дені сау әрі жан- жақты дамуында спорттың алар орны ерекше екені сөзсіз. Бұл ретте Қызылорда қаласының сол жағалауында бой көтерген «Үстел теннисі» орталығы бүгінде спорт сүйер қауымның сүйікті орнына айналды. «Samruk-Kazyna Trust» әлеуметтік жобаларды қолдау қорымен бірлесіп ашылған жаңа спорт кешенінде 16 үстел теннисі орналасқан ойын алаңы, 350 көрерменге арналған трибуна, жаттығу залы мен әкімшілік бөлмелер бар. Орталықта қазіргі уақытта 3 жаттықтырушы-оқытушы 350-ден астам спортшыны жаттықтыруда. Мұнда бір мезетте 32 спортшы жаттыға алады.
Жоғарыда аталған үлкен қолдаулардың арқасында теннис спортшылары көптеген жетістіктерге қол жеткізді. Атап айтқанда, 2024 жылдың мамыр айында үстел теннисінен өткен кіші жасөспірімдер арасында ҚР чемпионатының жұптық ойынында Аделя Әлжанова ІІ орын иеленсе, Әлем Би Айдарбек халықаралық жарысқа жолдама алды. Ал қазан айында Алматы қаласында өткен үстел теннисінен жасөспірімдер арасындағы «Алтын күз» республикалық ашық турнирінде спортшымыз Аделя Әлжанова жеңімпаз атанды. Сонымен қатар, қараша айында Ақтөбе қаласында өткен теннистен 10 жасқа дейінгі жасөспірімдер арасындағы ҚР Кубогінде спортшыларымыз ІІІ орынға иеленді.
Айта кетейік, тенниспен шұғылданғысы келетін жастар үшін «Нұрсәт» және «Үстел теннис» орталықтары кешкі сағат 19:00-ден 23:00 уақыт аралығында ақылы түрде жұмыс жасап тұр.
Нұр БАҚЫТ
Өзге де жаңалықтарды оқу үшін Telegram арнамызға жазылыңыз!