Елжас АЛТЫНБЕКОВ, футболшы:
Дала қасқырлары жаңа маусымда жергілікті футболшыларға иек артады. Бұл – қызылордалық аяқдопшылар үшін зор мүмкіндік. Бүгінде «Қайсар» екінші оқу-жаттығу жұмысына кірісуге дайын. Дайындық алдында команданың шабуылшысы Елжас Алтынбековпен әңгімелестік.
– Елжас, өткен маусым оңайға соқпады. Пандемия салдарынан премьер-лига желтоқсан айына дейін созылып, суық ауада доп тебуге мәжбүр болдық. Жалпы чемпионат жайлы аз-кем тоқталсаң…
– Әрине, өткен маусымды қиын болады деп ешкім күтпеді. Барлығы ойдағыдай басталғанмен 5 ай біріншілік үзіліп қалды. Соның салдарынан көп футболшы формасын жоғалтып алды. Оның арасында өзім де бармын. Тамыз айында жалғасқан соң ойындардың кестесі тығыз болды. Бір аптада 3 ойын өткізген сәттерді көрдік. Бұл футболшылар үшін ауыр болды.
– Өткен маусым сіз үшін сәтті болды деп айта алмаймыз…
– Иә, көп жағдайда қосалқы құрамда қалдым. Оның түрлі себептері бар. Жалпы командада әр позицияда бәсеке жоғары болды. Жаттығу барысында жарақат алып, біршама ойындардан тыс қалдым. Бар-жоғы 4 кездесуге шығып, бір мәрте көзге түстім. Бұл – шабуылшы үшін жақсы нәтиже деп айтуға келмейді. Алдағы маусымда көрсеткішті ұлғайтып, гол соғуға жұмыс істеймін.
– Командаға жергілікті жаттықтырушы Сұлтан Әбілдаевтың қайта оралғаны көпшілікті қуантты. Ойыншылар жаңа бапкерді қалай қабылдады?
– Команда Сұлтан Тоқатайұлы тағайындалғанына қуанды. Өңір футболын дамытуда зор еңбек еткен жаттықтырушы. 2016 жылы қол астында жаттығып, бірінші лигада бақ сынадық. Сұлтан бапкердың арқасында жеңімпаз болып, премьер-лигаға жолдама алдық. Білікті бапкер. Жаңа бапкермен ел клубтары арасында алғаш болып дайындықты бастадық. Жергілікті футболшыларға көңіл бөлуді қалайды. Бұл біз үшін жақсы жаңалық.
– БАҚ беттерінде өзіңді «Жетісу» мен «Атырауға» ауысады деген ақпар тарады. Бұл ақпарат қаншалықты рас?
– Қазір елде трансфер терезесі ашылып, командалар өздеріне қажетті ойыншыларды іріктеуде. Премьер-лигадағы 2-3 командадан ұсыныстар түсті. Бірақ әлі де нақтыланған жоқ. Сондықтан мына командаға ауысам деп айта алмаймын. Әзірге «Қайсардамын.» Өзімді түлеткен командада барлығы оңтайлы болса, аймақтың намысын қорғауға дайынмын.
Ерасыл ШӘРІБЕК
Өзге де жаңалықтарды оқу үшін Telegram арнамызға жазылыңыз!