Ұлттық бұйымдарды заманауи стильмен сәйкестендіріп ұсыну, күнделікті образдарға қоса білуге де ептілік пен талғам керек. Он саусағынан өнер тамған Айару Берікқызы – кәсіби білім алмаса да, тәжірибе мен талғамы арқылы түрлі ұлттық әшекейлерге тапсырыс қабылдап жүрген, жеке үйірмелер ұйымдастыратын қолөнер шебері. Кейіпкерімізбен қолөнер мен алғашқы тапсырысы жөнінде тілдескен едік.

– Мамандығыңыз мұғалім екен. Ал қолөнерге қалай келдіңіз? Алғашқы тапсырысыңыздың тарихымен бөліссеңіз…
– Өзім әл-Фараби атындағы ҚазҰУ-дың филология факультетінің түлегімін. Мамандығым – қазақ тілі мен әдебиеті. Осыдан 2 жарым жыл бұрын бір сериал көріп бастадым. Негізінен түрік сериалдарының табынушысы емеспін, мүлдем көрмейтінмін. Сондағы кейіпкер қыздың әр серия сайын ауыстыратын ұлттық киімі өзіне баурап алды. Басына қымбат тастармен көмкерілген әдемі бас киім киеді. Түрікше оның қалай аталатынын білмеймін. Бірақ кішкене құлағын, маңдайын, шекесін жауып тұрады.
Өзімнің анам – салт-дәстүрді жақсы білетін, ретімен ұстанатын кісі. Бір күні кешке шай ішіп отырып, осы сериалдағы қыздың образдары ұнағанын айттым. Бас киімдері көзге жақын орналасқан соң ерекше назар аудартып, сұлулығын аша түскендей. Осылайша неге қазақ қыздарына да тақияны әдемі тастармен әшекейлеп, сәнге айналдырмасқа деген ой келді. Бір жағынан, ұлттық бас киім. Екінші жағынан, заманауи, өз қалауымызша өзгеріс енгізіп көрсем деп ойладым. Идеяны жүзеге асыру үшін қажетті заттарын іздеп, жинақтай бастадым. Тақияны түрлендіру де – қолөнер. Қиялым мен қолымның икемін қосып, жаңа дүниені шығару барысында осы тастар мен заттардан әдемі шекелік, сырға жасауға да болар еді деп ойланып кететінмін. Ойдан ой, идеядан идея туындайды. Қолөнерге деген қызығу­шы­лығым одан сайын арта түсті.
Тақияға қолым үйренгенмен, өзіме шашбау жасап көргім келді. Оның қолданылуын, тарихын білген соң одан сайын шашбаудың қыздың бұрымында сыл­дырлап тұ­ра­тыны ерек­ше әсер ететін. Тақияны киюге ыңғай­сызда­натынмын. Алайда шаш­бауды күн са­йын тағып жүрдім.
Ол кезде мен колледжде сабақ беретінмін. Студенттерім маған қызығып, шашбауды қайдан алғанымды жиі сұрайтын. Олар өзінің қалауын, формасын айтады, ал мен тапсырысқа сай туынды жасауға талпынамын. Автобуста, қаланың орталығында жүргенде шашбауыма қатысты тұрғындардан, танымайтын адамдардан жиі лебіз еститінмін. Шашбауым көпшіліктің назарынан тыс қалмайтын. Тіптен автобуста бір адамнан тапсырыс қабылдаған кезім де болды.
– Қандай бұйымдарға тапсырыс көп?
– Уақыт өткен сайын жаңа идеялар келе бастады. Түн ішінде болса да, эскиздарын сызып қоятынмын. Сырғаны басқаша жасап көрсем, шекелікті осылай ұсынсам деген ойлар келеді. Жұрт не дер екен, жаман болып қалса ше деп ойламадым. Өзімнің шығармашылық идеяларымның іс-жүзінде көрініс тауып, жемісін бергенін қаладым. Қазір шолпы, шашбау, бесбілезік, сырға, шекелік, тақияға, одан да басқа бұйымдарға тапсырыс қабылдаймын. Көбіне бір рет тапсырыс берген адам жанындағы таныстарына айтып, менің жұмыстарымды мақтап, өздері тікелей жарнама жасайды десем болады. Орал қаласы бойынша тұрақты сатып алушылар, сыйға тарту үшін, образдарын жаңарту үшін тапсырыс беретіндер бар.
Наурыз мерекесі, ұзату, сырға салу тойларына орай тапсырыс беретіндер көп. Алайда соңғы кезде осындай атаулы күндерден бөлек күнделікті тұрмыста киіну стиліне қазақы нақыш еніп, заманауи киімдер ұлттық әшекейлермен толықтырылуда. Бұл үшін өте қуаныштымын. Себебі ұлттық әшекей кез келген образды ерекше етіп, көпшіліктің назарын аудартып тұрады. Қазақ қызы екенімізді, тарихымызды, ұлттық бол­мы­сымызды сый­лай­ты­нымызды көрсетеді. Қазір қыздарға арналған екі үйірмем бар. Біреуі бисермен жұмыс істеуге ба­ғытталса, екіншісінде қазақы нақыштағы қолөнер бұйымдарын жасауға баулиды. Осы үйірмеме қатысатын қыздар өздерінің алғашқы тапсырыстарын қабылдап, кәсіп бастауда. Тіпті, жеке брендтерін қалыптастырып келеді.
– Сұқбат үшін рақмет!

Әңгімелескен
Дина БӨКЕБАЙ

 

Өзге де жаңалықтарды оқу үшін Telegram арнамызға жазылыңыз!