Қазіргі жаһандану дәуірінде адамзат баласы бұрын-соңды болмаған мүмкіндіктерге ие болды. Біз енді бір күнде бір елде, келесі күні мүлде басқа құрлықта ояна аламыз. Ал осы таңғажайып мүмкіндік неліктен тек демалыс немесе ермек ретінде қарастырылады? Шын мәнінде, саяхат – бұл саналы адамның өмірінің бір бөлшегі, тіпті өмірінің кепілі десек те артық емес.

Саналы адам әрдайым өз көкжиегін кеңейтуді қалайды. Ол шекарадан асып, жаңа мәдениеттермен танысып, өз болмысын қайта таниды. Саяхат барысында біз өзімізге таныс емес орталарға түсіп, санамызды сергітеміз. Әлемнің әр бұрышындағы әртүрлі өмір салттары мен дүниетанымдар адамның ой-өрісін кеңейтеді. Бұл – нағыз ақылдың жаттығуы.

Тынығу емес – тірілу

Көп адам саяхатты жай ғана демалу деп түсінеді. Бірақ бұл – тек беткі жағы ғана. Нағыз саяхат – бұл ішкі жаңару, жан-дүниенің қайта тірілуі. Әр сапар – бұл бір өмір. Таңертең басқа тілде амандасып, басқа елдің таңғы шайын ішіп, кешке бейтаныс көшелермен серуендеу – бұл ішкі қуатты қайта оятатын қасиетті процесс.

Өнер адамдары, ғалымдар, жазушылар – бәрі де саяхаттан шабыт іздейді. Себебі жаңа орта, тосын эмоция, күтпеген көріністер – адамның шығармашылық қабілетін ашатын құпия кілт. Леонардо да Винчи, Николай Гоголь, Мұқағали Мақатаев – бәрі де сапар шегіп, өмірінің ең құнды ойларын жол үстінде тапқан.

Ғылыми зерттеулерге сүйенсек, үнемі сапар шегіп, жаңа орындарға барған адамдардың стресске төзімділігі жоғары болады. Олар өмірге позитивпен қарап, ұзақ өмір сүреді. Себебі саяхат тек ақылды ғана емес, денені де сауықтырады. Таза ауа, табиғат аясында серуендеу, теңізде жүзу – бәрі де денсаулыққа шипа.

Саяхат – өмір мәнін терең түсінудің жолы

Саяхат барысында адам көп нәрсені салыстырады: өз елі мен өзгені, өз өмірі мен басқалардың тағдырын. Бұл салыстыру арқылы біз шүкіршілікті үйренеміз, әр сәттің құндылығын түсінеміз. Бір сәттік күн шуағы, бейбіт аспан, жергілікті халықтың күлімдеген жүзі – осылардың бәрі бізді адамдық болмысқа қайта оралтады.

Қорытындылай келе, саяхат – бұл жай ғана жол емес. Бұл – сана жолы, рухани өсу жолы, шексіз шабыт пен шынайы өмірге апарар жол. Саналы адам үшін саяхат – өмірдің сәні ғана емес, өмірдің кепілі.

Нұрислам БАХТИЯР,
№39 Қызылөзек орта мектебінің оқушысы

 

Өзге де жаңалықтарды оқу үшін Telegram арнамызға жазылыңыз!