Елімізде ауыл азаматтары үшін 2 855 тұрғын үй салу жоспарланған. Ол үшін 14,3 млрд теңге қарастырылып жатыр. Бұл жайында Индустрия және инфрақұрылымды даму министрінің міндетін атқарушы Марат Қарабаев мәлім етті, деп хабарлайды ҚазАқпарат тілшісі.
«Халықтың ауылдық және шекара маңындағы аумақтардан көшуін азайту мақсатында бірінші кезекте жаңа өндірістерді іске қосу арқылы тұрақты жұмыс орындарын құру жоспарланып отыр. Аталған жобалар өнеркәсіп қорында көзделген қаражат есебінен жүзеге асырылмақ», – деді Марат Қарабаев Үкімет отырысында.
Сондай-ақ, спикер ауыл тұрғындарын баспанамен қамту мәселесін қозғады.
«Ауыл тұрғындарына жалға берілетін тұрғын үй салушылардың шығындарын субсидиялау тетігі іске қосылды. Осы тетік арқылы ауыл азаматтарына 2 855 тұрғын үй салу жоспарланған (14,3 млрд теңге). Бұдан басқа, ауылда жеке тұрғын үй құрылысын ынталандыру мақсатында жыл сайын 22 мың жер учаскесі инженерлік коммуникациямен қамтамасыз етіледі», – дейді ол.
Оның айтуынша, ұлттық инфрақұрылымдық жоспарды әзірлеу үшін мүдделі мемлекеттік және жергілікті атқарушы органдар өкілдерінен тұратын жұмыс тобы құрылады.
«Халықтың сапалы тыныс-тіршілік деңгейін арттыру және инфрақұрылымдық дамудың негізгі проблемаларын шешу міндеті тұр. Жоспар бойынша базалық инфрақұрылым жобалары, оның ішінде автомобиль және темір жолмен, авиажелілермен, сумен, жылумен, газбен және электрмен жабдықтау, сондай-ақ байланыс, телекоммуникациямен (телефон, интернет) және басқа инфрақұрылыммен қамтамасыз ету көзделеді», – дейді министрдің міндетін атқарушы.
Өзге де жаңалықтарды оқу үшін Telegram арнамызға жазылыңыз!