FlyArystan әуе компаниясының ұшағы Ақтауға екі рет қона алмады, деп хабарлайды «Адырна» ұлттық порталы.
«КС7277 рейсі Атырау – Ақтау бағытында 2 қараша күні сағат 06.40-та ұшып шығуы тиіс болатын. Алайда, әуе компаниясы Ақтау қаласындағы ауа райының қолайсыздығына байланысты рейсті кейінге қалдыруға мәжбүр болды», – деп мәлімдеді FlyArystan баспасөз қызметі.
2 қараша күні сағат 21.50-де ұшақ қою тұман салдарынан Ақтауға қона алмай, кері қайтқан. Келесі күні таңғы сағат 7-де ұшақ қайтадан қона алмады.
Рейстің қайтадан ұшу уақыты 3 қараша 17:30-ға жоспарланған.
Жергілікті «Ақ Жайық» басылымының хабарлауынша, жолаушылар ұшақ күту кезінде ыстық тамақ пен басқа да қолайлы жағдайлардың жоқтығына наразы болған.
«Кідіріс кезінде жолаушыларға су және ыстық тамақ, сондай-ақ өтініш бойынша қонақүйде тұру және тұрғын үй құнын өтеуге кепілдік хаттар берілді», – деп жауап берді FlyArystan қызметі.
Өзге де жаңалықтарды оқу үшін Telegram арнамызға жазылыңыз!