Фото: akorda.kz
Мәдениет және ақпарат министрі Аида Балаева Air Astana әуекомпаниясының қызметкерінің әдепсіз қылығына қатысты желіде жазба жариялады, деп хабарлайды «Адырна» ұлттық порталы.
Аида Ғалымқызы әуекомпанияның қызметкерлерін мәдениеттілікті сақтауға, жасы үлкен жолаушыларға сыпайылық танытуға шақырды.
«Құрметті достар! Қазақстанның және КСРО-ның халық әртісі, аты аңызға айналған әнші Бибігүл Төлегеновны Air Astana әуе компаниясының бортына отырғызу кезінде болған өте ыңғайсыз жағдай мені де қатты алаңдатты.Әуе компаниясы бұл мәселе қатысты түсініктеме беріп, әуе қауіпсіздігінің халықаралық ережелері еске салды. Әрине, ұшақтың және жолаушылардың қауіпсіздігін қамтамасыз етуге арналған ережелер қатаң сақталуға тиіс. Дегенмен, әуе компаниясымен пікір қайшылығына бармай-ақ, орын алған жағдайға байланысты өз ойымды білдіргім келеді. Нақтырақ айтқанда, әуе компаниясы мен оның қызметкерлері ішкі нұсқаулықтардан бөлек, қарапайым этиканы, адами қарым-қатынасты сақтап, өз клиенттеріне құрметпен қарауы керек деп есептеймін. Әсіресе, жасы үлкен жолаушыларға, Отан алдында айрықша еңбегі бар адамдарға ерекше құрмет көрсетілуге тиіс. Өйткені аға буынға құрмет – тәрбие мен ішкі мәдениет мәселесі» деп жазды ол.
Сондай-ақ, министр Бибігүл Төлегенованың ел үшін құрметті азамат екенін еске салып, ізгі тілегін жазды.
«Ал қазақ өнерінің бұлбұлы, өнер майталманы Бибігүл Ахметқызына зор денсаулық, ұзақ өмір мен сарқылмас күш-жігер тілеймін!» деді Аида Ғалымқызы.
Өзге де жаңалықтарды оқу үшін Telegram арнамызға жазылыңыз!