Ипотекалық несие арқылы сатып алынған пәтер қарыз алушының атына тіркелгенімен, қарыз толық өтелгенге дейін ол банктің кепілінде тұрады. Сол себепті пәтер иесі оны толық көлемде өз қалауынша пайдалана алмайды. Осыған байланысты Aikyn.kz сайты ипотекалық пәтерге қатысты шектеулерді түсіндіреді.
1. Пәтерді қайтадан кепілге қоюға болмайды
Өйткені ол басынан бастап банктің кепілінде тұр.
Ал мәселен, меншік иесі пәтерді сату мүмкін делік. Бірақ бұл үшін міндетті түрде банкпен келісу қажет. Егер қарыз алушы төлемде қиындықтарға тап болса, банк әдетте түсіністікпен қарап, пәтерді өз бетінше сатуға рұқсат береді. Мұндай жағдайда бірнеше жол бар.
Көбіне қарыз алушы сатып алушы табады. Ол сатып алушы несиені қарыз алушының орнына өз қаражатымен өтейді немесе сол банктен жаңа ипотекалық несие рәсімдейді. Сондай-ақ пәтерді сыйға тартуға да болады. Бірақ бұл да банк келісімімен ғана жүзеге асады. Мұндайда барлық қарыздық міндеттеме пәтердің жаңа иесіне жүктеледі.
2. Егер несие шартында пәтерді қайта жоспарлауға қатысты шектеу қойылса, онда пәтерді қайта жоспарлауға болмайды
Кейбір банктер несие келісімінде меншік иесіне қайта жоспарлау жүргізуге тыйым салады немесе мұндай өзгерістерді алдын ала банкпен келісуді талап етеді.
Бұл талап пәтердің құнын түсірмеу үшін енгізіледі. Себебі жөнсіз өзгерістер баспананың жағдайын нашарлатып, нарықтағы бағасын төмендетуі мүмкін. Ал егер қарыз алушы қайта жоспарлау кезінде талапты бұзып, кейін несиені төлей алмай қалса, оның салдарымен банк айналысуға мәжбүр болады. Осы себепті банктер әдетте заңдастырылмаған қайта жоспарлауы бар пәтерлерді кепіл ретінде қабылдауға құлықсыз.
Өзге де жаңалықтарды оқу үшін Telegram арнамызға жазылыңыз!