Фото: Tengrinews.kz
Петропавлда бірнеше күндік аяздан кейін күрт жылыну болып, қардың еруі салдарынан қала көшелерін су басты, деп хабарлайды “Адырна” ұлттық порталы tengrinews.kz-ке сілтеме жасап.
Қала тұрғындары жаяу жүргінші жолдарынан үлкен шалшықтардан өту мүмкін емес екенін айтып шағымдануда. Сонымен қатар, аулалардағы балшық пен босап кеткен қар автокөлік қозғалысына кедергі келтіруде.
Жұмысшы кентінің тұрғындары әлеуметтік желілерде көшелердің 90%-ы тізеден келетін лайға айналғанын мәлімдеді. Олардың айтуынша, жолдарды қардан тазарту жұмыстары уақытында жүргізілмеген.
“Көлікпен үйге жету мүмкін емес, ал әкімдік тарапынан ешқандай шара қабылданбай жатыр,” – деп жазды тұрғындардың бірі.
Сондай-ақ, Универсальная көшесіндегі үйлердің тұрғындары жаңа теміржол көпірінің құрылысы кезінде су ағатын арықтардың бітеліп қалғанын айтты. Соның салдарынан еріген қар суы олардың үйлеріне кіре бастаған.
“Құрылыс басталғанға дейін мұндай мәселе болған жоқ. Қазір судың ағатын жері жоқ, сондықтан үйлерімізге қарай жайылып жатыр,” – деді тұрғындар.
Петропавл қалалық тұрғын үй-коммуналдық шаруашылығы бөлімі мәселені шешу үшін арнайы техниканың жіберілгенін хабарлады.
“Қала тұрғындарының қауіпсіздігін қамтамасыз ету мақсатында су сорғыш техникалар жұмыс істеуде. Сонымен қатар, мердігер ұйымдарға судың үйлерге жақындауына жол бермеу үшін шара қабылдау тапсырылды,” – деп мәлімдеді ведомство өкілдері.
Алайда, бұл жауап тұрғындарды қанағаттандырмады. Олар су тасқынына көпір құрылысы себеп болғанын және бұл мәселені халықтың өз мойнына алуын әділетсіздік деп санайды.
Төтенше жағдайлар департаментінің мәліметінше, өңірде алдын алу шаралары белсенді жүргізілуде:
• 950 мың текше метр қар шығарылған;
• 47 шақырым қорғаныс бөгеттері салынды, 41 шақырымы нығайтылған;
• 108 су өткізу құбыры орнатылған;
• 214 шақырым нөсер кәріз жүйесі тазартылған.
Су тасқыны кезеңіне 1900-ден астам құтқарушы, 1350-ге жуық арнайы техника, 462 мотопомпа және 122 қайық дайындалған.
Қауіптің алдын алу үшін тұрғындарға мүмкіндігінше су басу қаупі бар аумақтардан уақытша кету ұсынылады.
Өзге де жаңалықтарды оқу үшін Telegram арнамызға жазылыңыз!