Фото: Х желісі/Donald Tusk
Польша «Шығыс қалқаны» бағдарламасы аясында Ресеймен шекарада қорғаныс бекіністерін салуға кірісті. Бұл туралы премьер-министр Дональд Туск мәлімдеді, деп хабарлайды “Адырна” ұлттық порталы.
«Шығыс қалқаны» (Tarcza Wschód) — қорғаныс министрлігі мен Польша армиясының Бас штабы әзірлеген бағдарлама, ол Польшаның Ресей және Беларусь шекараларында әртүрлі бекіністердің, рельефтік кедергілер мен әскери инфрақұрылымның құрылысын қамтиды. Жалпы ұзындығы шамамен 800 шақырымды құрайтын жоба ағымдағы жылдың мамыр айында таныстырылған.
Сондай-ақ, Польша премьер-министрі X платформасында жұмыс басталғанын хабарлады.
«Шығыс қалқанының құрылысы басталды! Ресеймен шекарадағы алғашқы жұмыс», – деп жазды ол постқа жұмыс істеп тұрған құрылыс техникасы бейнеленген фотосуретті жариялап.
2024-2028 жылдар аралығында жүзеге асыруға 10 миллиард злотый (шамамен 2,5 миллиард доллар) бөлінген «Шығыс қалқаны» ұлттық тежеу және қорғаныс бағдарламасын құру туралы қаулыны 10 маусымда Министрлер Кеңесі қабылдады.
Премьер-министр кеңсесінің мәлімдемесінде айтылғандай, «үкімет Беларусь пен Ресейден келетін қауіптерге қарсы тұру үшін НАТО-ның шығыс қапталында жан-жақты қорғаныс инфрақұрылымын құруға ниетті».
«Шығыс қалқаны» бағдарламасы, атап айтқанда, негізгі шекаралық аудандарда бекіністер салу және жердегі табиғи кедергілер жасауды қамтиды. Атап айтқанда, шекаралық аймақта арық қазу, мина алаңдарын орналастыру, танкіге қарсы кірпі орнату жоспарланған.
Ол сондай-ақ тиісті барлау және қауіп-қатерді анықтау жүйелерін, форвардтық базаларды, логистикалық хабтарды, қоймаларды салуды немесе ұшқышсыз ұшуға қарсы қорғаныс жүйелерін орналастыруды қарастырады.
Мақсат, бір жағынан, поляк әскеріне шекараны қорғауды барынша жеңілдету, ал екінші жағынан, ықтимал агрессордың ел аумағына енуін қиындату.
Польшаның шығыс және солтүстік шекаралары бойындағы бекіністердің құрылысы негізгі воеводстволарды қамтиды: Померан, Варм-Масур, Люблин, Подласки және Подкарпакье.
Өзге де жаңалықтарды оқу үшін Telegram арнамызға жазылыңыз!