Фото: Солтан Жексенбеков / Kazinform
KAZINFORM – Қазақстандағы референдум ашық, әділ және инклюзивті өтіп жатыр. Бұл туралы Шанхай Ынтымақтастық Ұйымы (ШЫҰ) Бас хатшысының орынбасары Олег Копылов мәлімдеді.
Оның айтуынша, дауыс беруге мүмкіндік барлық азаматтар үшін, соның ішінде мүмкіндігі шектеулі адамдар үшін де толық қамтамасыз етілген. Арнайы шрифт қолданылып, Конституция мәтіні аудио арқылы оқылады. Сайлау учаскелерінде пандустар орнатылған.
– Біз облысқа шығып, сайлау учаскелерін аралап көрдік. Барлық учаскелерде дайындық жоғары деңгейде, бұл үлкен еңбек пен кәсіби ұйымдастырудың нәтижесі, – деді Копылов.
Миссия құрамында 17 байқаушы бар, олардың ішінде заң шығарушы органдар мен Орталық сайлау комиссияларының өкілдері, сондай-ақ Қазақстанда аккредиттелген дипломаттар бар. Референдум аяқталған соң байқаушылар бірігіп бақылау нәтижелері туралы мәлімдеме жасайды.
– Алдын ала бақылауларға сүйене отырып, Қазақстан тарапының референдумды ұйымдастырудағы еңбегін атап өтуге болады. Халық белсенді қатысып жатыр, сайлау учаскелерінде жағымды атмосфера байқалады. Адамдар отбасымен, балаларымен бірге дауыс беріп жатыр, жастар да белсенді, – деді ол.
ШЫҰ байқаушылар миссиясы референдумның Қазақстандағы демократиялық принциптерді нығайтуға және заң үстемдігін қамтамасыз етуге үлес қосатынына сенім білдірді.
– Ашық, әділ және инклюзивті референдумды халықаралық стандарттарға сәйкес өткізу елдің тұрақты дамуы мен өркендеуінің кепілі,– деп қорытындылады Олег Копылов.
Өзге де жаңалықтарды оқу үшін Telegram арнамызға жазылыңыз!