SMARTNEWS.KZ басылымының хабарлауынша, Шымкент қаласында Жастар театрының директоры мен өзге де лауазымды тұлғалар 136 миллион теңгеден астам бюджет қаржысын жымқырды деген күдікпен қамауға алынды. Бұл туралы Қаржылық мониторинг агенттігінің қалалық департаменті мәлімдеді.
Тергеу мәліметінше, мемлекеттік бюджеттен концертке арналған техника сатып алуға — колонкалар, сабвуферлер, сахналық ферма, күшейткіштер, микрофондар және тағы басқа жабдықтарға жалпы сомасы 320 млн теңге бөлінген.
Алайда тендер өткізу тәртібі бұзылып, сатып алулар 20-дан астам атауға бөлшектеліп, электронды дүкен арқылы жүргізілген. Жабдықтар нақты жеткізілмеген, ал келісімшарттар жалған кәсіпкерлермен жасалған.
«Бюджет қаржысы қолма-қол ақшаға айналдырылып, жымқырылған. Күдіктілердің бірі заңсыз табысына 48 млн теңгеге автокөлік пен пәтер сатып алған. Бұл мүліктер сенімді адамдардың атына рәсімделіп, жасырылған», — делінген агенттік хабарламасында.
Соттың санкциясымен бұл мүлікке тыйым салынған. Қазіргі таңда күдіктілер қамауға алынған.
Өзге де жаңалықтарды оқу үшін Telegram арнамызға жазылыңыз!