Журналист Михаил Козачков өзін күдікті деп таныған баптардың тізімі айтарлықтай қысқарғанын мәлімдеді. Жақында ол түрмеден үйқамаққа шығарылған еді деп хабарлайды Stan.kz ақпарат агенттігі.
Козачков өзінің мемлекеттік құпияларды жария еткенін мойындаған.
«Өткен сенбіде айыптың өзгеруіне байланысты бұлтартпау шарасы өзгертілген. Мен барлық мәліметтерді ашып айта алмаймын, бірақ күдікті ретінде қаралған баптардың тізімі айтарлықтай қысқарды. Мәселен, менің мойындауымнан кейін мен заңсыз жария еткен мемлекеттік құпияларды жария ету ісі тоқтатылды», – деді журналист дүйсенбіде.
Ол сонымен қатар материалдар мен мақалаларды жариялау кезінде оның тарапынан заң бұзушылық анықталғанын атап өткен.
«Журналистика зерттеуімен айналысып, тынымсыз ізденіс үстінде боласың әрі ылғи шетте жүресің. Сөйтіп, мен бірнеше адамның жеке деректерін заңсыз жинап, таратып жібердім. Мен қателескенімді түсінемін, бір сәтте шындықпен байланысым үзілді, мен бұл үшін жауапкершілікті көтеруге дайынмын. Енді мен сотты күтіп отырмын және ол маған жұмсақтық танытады деп сенемін», – дейді Козачков.
Ол сондай-ақ, жұмысынан зардап шеккендер – Әбдіғаппаровтар отбасы, Зарина Ақшолақова және Әзім Абдуллаевтардың отбасынан кешірім сұрайтынын жеткізген.
Еске салайық, 18 желтоқсанда қаржы мониторинг агенттігі журналист, Kozachkov offside телеграм-арнасының авторы Михаил Козачковтың ұсталғаны белгілі болды.
Ол «Болат Назарбаевтың көмекшісі» деп аталған Елдос Қоспаевтың қылмыстық тобына рейдерлік жасауға көмектесті деген күдікке ілінген. Агенттік өкілдерінің айтуынша, Қоспаев «рейдерлік құрбандарына ақпараттық шабуыл жасау үшін Козачковтың қызметіне жүгінген». Козачков сол үшін «қылмыстық топ мүшелерінен» 52 млн теңге (110 мың доллар) сыйақы алған деп айтылады. Журналистің әріптестері Козачковты кәсіби қызметі үшін қудалап отыр деп мәлімдеді.
20 желтоқсанда бас прокуратура журналист Михаил Козачковтың ісі «прокуратура органдарының бақылауында болады» деп айтқан.
20 желтоқсанда Алматы тергеу соты Козачковты екі айға қамады.
18 ақпанда Козачков тергеу изоляторынан үйқамаққа ауыстырылды.
Өзге де жаңалықтарды оқу үшін Telegram арнамызға жазылыңыз!