KAZINFORM — Күнде М1.88 класындағы жарқыл тіркелді, бұл тамыз айының басынан бергі ең қуатты жарқыл болды.
Ресей Ғылым академиясы Ғарыштық зерттеулер институтының Күн астрономиясы зертханасының мәліметінше, бұл соңғы тәуліктегі М класындағы екінші жарқыл. Ғалымдар Күн белсенділігінің күрт күшеюін күтпейді. Алдын ала бағалаулар бойынша, белсенді аймақ шарықтау шегіне жетіп келеді. Осыдан кейін жарқылдар санының одан әрі арту ықтималдығы төмендеуі тиіс.
Алдыңғы тәулікте Күнде 19 жарқыл тіркелген. Геомагниттік белсенділік әлі де жоғары деңгейде, алайда Жерде шамамен 20 сағат бойы айтарлықтай ауытқулар байқалмаған. Дегенмен жекелеген белсенділік күшеюі мүмкін.
Демалыс күндері ғарыштағы ауа райы қалыпты жағдайға оралуы мүмкін.
Айта кетейік, магниттік дауылдардың адамдарға әсері туралы ғылыми консенсус жоқ. Алайда, медицина мамандары олардың әл-ауқатқа әсер етуі мүмкін екенін, қан қысымының жоғарылауына, бас ауруына, еңбекке қабілеттіліктің төмендеуіне, мазасыздыққа және аллергия, сондай-ақ созылмалы аурулардың өршуіне әкелуі мүмкін екенін айтады.
Өзге де жаңалықтарды оқу үшін Telegram арнамызға жазылыңыз!